بھارت کے سابق سیاستدان اور سینیٹر شانتہ چیتری نے وزیراعظم نریندر مودی کی حکومت کو اندرونی خلفشار اور ناکام خارجہ پالیسی کے باعث عالمی سطح پر تنہائی کا شکار قرار دیتے ہوئے کہا ہے کہ مودی حکومت کے بلند و بانگ دعوؤں کے برعکس بھارت اسوقت سنگین سیاسی، معاشی اور سفارتی مسائل میں گھرا ہوا ہے۔
ان کے مطابق مودی کی سفارتکاری زمینی حقائق سے مطابقت نہیں رکھتی اور جھوٹے دعوؤں پر مبنی ہے۔
انہوں نے کہا کہ بھارت کی معیشت، خارجہ پالیسی اور سٹریٹجک حیثیت پر سنجیدہ سوالات اٹھ رہے ہیں جبکہ بڑھتے ٹیکس، بیروزگاری اور مہنگائی نے عوام کی مشکلات میں اضافہ کر دیا ہے۔
امریکا کی جانب سے بھارت پر تجارتی ٹیرف عائد کئے گئے اور بھارت کو چاہ بہار بندرگاہ جیسے اہم منصوبے سے بھی پیچھے ہٹنا پڑا جو بھارتی خارجہ پالیسی کی ناکامی کا ثبوت ہے۔
شانتہ چیتری کا کہنا تھا کہ پاکستان کو عالمی سطح پر تنہا کرنے کی بھارتی پالیسی مکمل طور پر ناکام ہو چکی ہے اور اس کے برعکس پاکستان نے موثر حکمت عملی کے ذریعے امریکا، سعودی عرب، ترکیہ اور چین کیساتھ اپنے تعلقات مزید مضبوط کئے ہیں۔
انہوں نے دعویٰ کیا کہ اسلامی ممالک کے درمیان ابھرتا ہوا اتحاد بھارت کیلئے ایک نیا سٹریٹجک چیلنج بن چکا ہے اور اگر مستقبل میں کوئی تنازع یا جنگ ہوئی تو بھارت کو صرف پاکستان نہیں بلکہ ایک وسیع اتحاد کا سامنا کرنا پڑ سکتا ہے، بھارت اسوقت نہ صرف معاشی بلکہ فوجی سطح پر بھی مشکلات میں گھرا ہوا ہے جبکہ اندرونی طور پر بیروزگاری، مہنگائی، عدم مساوات اور ماحولیاتی مسائل سنگین شکل اختیار کر چکے ہیں۔
انہوں نے الزام عائد کیا کہ مودی حکومت اپنی ناکامیوں اور عالمی سطح پر ہزیمت کو چھپانے کیلئے مذہبی اور ثقافتی تنازعات کو ہوا دے رہی ہے۔
