چیف جسٹس پاکستان یحییٰ آفریدی کی زیر صدارت ہونیوالے اہم ٹیکس مقدمات کے جلد فیصلوں کی حکمت عملی کے حوالے سے اعلیٰ سطح اجلاس کا اعلامیہ جاری کر دیا گیا ہے جس کے مطابق جسٹس میاں گل حسن اورنگزیب، چیئرمین ایف بی آر، ممبر لیگل ایف بی آر اور اعلیٰ حکام نے اجلاس میں شرکت کی، چیف جسٹس یحییٰ آفریدی نے کہا کہ طویل المدتی ٹیکس مقدمات مالی گنجائش کو محدود اور سرمایہ کاروں کے اعتماد کو متاثر کرتے ہیں، قومی معیشت پر اثر انداز ٹیکس مقدمات کے فوری فیصلے عدالتی ترجیح ہونگے، ٹیکس مقدمات میں تاخیر سرمایہ کاری اور معاشی استحکام کیلئے نقصان دہ ہے۔
اعلامیہ کے مطابق اجلاس میں طویل عرصے سے زیر التوا اور بھاری مالیت کے ٹیکس تنازعات کے حل پر تفصیلی غور کیا گیا، زیادہ مالیت کے ٹیکس کیسز کو ترجیحی بنیادوں پر نمٹانے پر اتفاق کیا گیا۔
اجلاس میں عدلیہ اور ٹیکس حکام کے درمیان بہتر رابطہ اور ہم آہنگی پر زور دیا گیا، ٹیکس مقدمات میں یکسانیت اور تیز رفتار فیصلوں کیلئے ادارہ جاتی اصلاحات پر غور کیا گیا۔
