وزیراعلیٰ پنجاب مریم نواز شریف نے 18 اہم صوبائی سڑکوں کیساتھ ساتھ زرعی، صنعتی اور شہری اہمیت کی 24 راہداریوں کی تعمیر و ترقی کے منصوبوں کی منظوری دیتے ہوئے کہا ہے کہ 2026 میں سڑکیں، مکانات، ہاسٹلز، واٹر انفراسٹرکچر اور سیوریج سسٹم کی تعمیر و مرمت نجی شعبے کی شراکت داری سے کی جائیگی۔
یہ منظوری انہوں نے ایک خصوصی اجلاس کی صدارت کرتے ہوئے دی۔
اجلاس میں فیصلہ کیا گیا کہ 150 کلومیٹر طویل دیپالپور، پاکپتن، وہاڑی روڈ کو نجی شعبے کی مدد سے دو رویہ بنایا جائیگا، 100 کلومیٹر چراغ آباد، جھنگ، شورکوٹ روڈ کو دو رویہ تعمیر کرنے کی اصولی منظوری بھی دی گئی، اسکے علاوہ مظفرگڑھ، علی پور، ٹی ایم پناہ روڈ، ساہیوال سمندری روڈ اور بہاولپور جھنگڑا شرقی روڈ پر اضافی کیرج وے نجی شعبے کی شراکت سے بنائی جائیں گی، سیالکوٹ، پسرور، گوجرانوالہ، حافظ آباد، وزیر آباد اور ڈسکہ کی سڑکوں کی اپ گریڈیشن بھی منصوبے میں شامل ہے۔
وزیراعلیٰ نے صوبے میں پرانے واٹر انفراسٹرکچر کی بحالی، صاف پانی کی فراہمی اور سیوریج سسٹم میں بہتری کا ہدف مقرر کیا، اجلاس میں فیصلہ کیا گیا کہ چکوال اور قصور میں نکاسی آب و پانی فراہمی کے منصوبے بھی پبلک پرائیویٹ پارٹنرشپ کے تحت مکمل کیے جائینگے جبکہ منصوبوں کیلئے ٹرانزیکشن ایڈوائزر مقرر کرنے کی بھی اجازت دی گئی۔
اجلاس میں سرکاری یونیورسٹیوں اور میڈیکل کالجوں میں طلبہ کیلئے آن کیمپس رہائشی سہولیات کی فراہمی پر بھی غور کیا گیا اور تمام محکموں کو ہدایت کی گئی کہ وہ نجی شعبے کے تعاون سے ممکن اور قابل عمل منصوبوں کی نشاندہی کریں، نجی شعبے کی مدد سے جدید ٹیکنالوجی اور مشینری کے ذریعے سڑکوں کی تعمیرو مرمت اور دیکھ بھال کی جائیگی، سڑکوں پر ٹول وصول کرنے کا جدید نظام نافذ کیا جائیگا تاکہ مسافروں کو بہترین سفر اور سہولیات فراہم کی جا سکیں، سفر کے دوران دورانیہ میں کمی اور حفاظت کو یقینی بنایا جائیگا۔
سینئر صوبائی وزیر مریم اورنگزیب نے اجلاس میں کہا کہ پبلک پرائیویٹ پارٹنرشپ کے شفاف ماڈل سے پنجاب اور عوام دونوں ترقی کی شاہراہ پر تیزی سے آگے بڑھیں گے، وزیراعلیٰ کے وژن کے تحت ہر شعبے میں سرکاری اور نجی شعبے کی شراکت داری سے منصوبوں کے آغاز کی ہدایت دی گئی۔
اجلاس میں متعلقہ وزارتوں و محکموں کے اعلیٰ حکام اور نجی شعبے کے نمائندوں نے شرکت کی جبکہ پبلک پرائیویٹ پارٹنرشپ اتھارٹی نے سڑکوں، پانی اور عوامی سہولیات کے منصوبوں پر بریفنگ دی۔
