رملہ(شِنہوا)فلسطین کے صدر محمود عباس نے کہا ہے کہ آزاد فلسطینی ریاست کا قیام ایک اٹل حقیقت ہے۔ انہوں نے اس بات کا اعادہ کیا کہ فلسطینی مستحکم طور پر آزادی اور خودمختاری کی طرف بڑھ رہے ہیں۔
فلسطینی نیوز ایجنسی وفا کی جانب سے جاری کئے گئے بیان کے مطابق صدر عباس نے اس بات پر زور دیا کہ مکمل خودمختار فلسطینی ریاست کا قیام ہونا چاہیے جس کا دارالحکومت مشرقی یروشلم ہو اور اس کے ساتھ بین الاقوامی قراردادوں اور عرب امن منصوبے کے مطابق مہاجرین کی اپنے گھروں کو واپسی بھی ضروری ہے۔
انہوں نے کہا کہ فلسطینی غزہ اور مغربی کنارے میں سب سے سفاک جنگ اور جدید تاریخ کی بدترین نسل کشی کا استقامت کے ساتھ مقابلہ کر رہے ہیں۔ انہوں نے اسرائیل پر بین الاقوامی قانون، بین الاقوامی قانونی حیثیت اور جنگ بندی معاہدوں کی خلاف ورزی کا الزام عائد کیا۔
انہوں نے زور دیا کہ فلسطینی عوام ہتھیار نہیں ڈالیں گے، اپنے مادروطن کو نہیں چھوڑیں گے اور نہ ہی بے دخلی یا نقل مکانی کے منصوبوں کو قبول کریں گے۔
انہوں نے قومی اتحاد کا مطالبہ کرتے ہوئے فلسطینی عوام پر زور کہ وہ فلسطین لبریشن آرگنائزیشن کے پلیٹ فارم کے تحت متحد ہوں۔ انہوں نے اس تنظیم کو فلسطینی عوام کی واحد جائز نمائندہ تنظیم قرار دیا۔
