لہاسا(شِنہوا)دراک موک ریلوے سٹیشن، جو چھنگ ہائی-شی زانگ ریلوے پر 4 ہزار 721 میٹر کی بلندی پر واقع ہے، مسافروں کے لئے کھول دیا گیا جس سے یہ "دنیا کی چھت” پر پھیلی ریلوے لائن کا سب سے بلند مسافر سٹیشن بن گیا۔
تقریباً صبح 11 بجے 50 سے زائد مسافر زیڈ-9817 ٹرین میں سوار ہوئے جو علاقائی دارالحکومت لہاسا کے لئے روانہ ہوئی جس سے اس سٹیشن کا افتتاح ہوا۔ یہ سٹیشن شی زانگ خودمختار علاقے کے ناگ چھو شہر کی امدو کاؤنٹی کے قصبے دراک موک میں واقع ہے۔
اس سے پہلے اس سٹیشن پر عملہ نہیں تھا تاہم بڑھتی ہوئی سفری طلب اور قریبی علاقے میں سیاحت کی ترقی کے پیش نظر اسے مسافروں کی سہولت کے لئے بہتر بنایا گیا ہے، ان علاقوں میں تانگ گولا رینج جیسے قدرتی سیاحتی مقامات شامل ہیں۔
مقامی چرواہا اور زیڈ-9817 ٹرین کے پہلے مسافروں میں شامل چھمپا نے کہا کہ ریل کے سفر کی وجہ سے بس کے ذریعے چار گھنٹے سے زیادہ کا سفر صرف دو گھنٹے میں مکمل ہو جاتا ہے جو زیادہ تیز اور محفوظ سہولت فراہم کرتی ہے۔ انہوں نے مزید کہا کہ ٹکٹ کی قیمت 28.5 یوآن (تقریباً 4 امریکی ڈالر) بس کے 70 یوآن کرایے کے مقابلے میں بہت کم ہے۔
اس لائن کو چلانے کی ذمہ دار چائنہ ریلوے چھنگ ہائی-شی زانگ گروپ کمپنی کے مطابق اس سٹیشن سے قریبی 25 دیہات کے 10ہزار سے زائد رہائشی اور سیاح فائدہ اٹھائیں گے اور اس سے کھانے پینے اور رہائش کے مقامی کاروبار کو بھی فروغ ملے گا۔
لہاسا اور چھنگ ہائی صوبے کے دارالحکومت شی نِنگ کو ملانے والی چھنگ ہائی-شی زانگ ریلوے جولائی 2006 میں فعال ہوئی جس سے شی زانگ کی ریلوے سے محرومی کا دور ختم ہو گیا۔
