اسلام آباد: رہنماء پی ٹی آئی بیرسٹر علی ظفر نے کہاہے کہ اپوزیشن کے یکجہتی پیغام کے باوجود حکومت سیاست کھیل رہی ہے، ہم پرامن، ذمہ دار قوم، مقابلہ بھارتی عوام نہیں،انتہاء پسند مودی حکومت سے ہے، جنگ نہیں چاہتے مگر حملہ ہوا تو منہ توڑ جواب دیں گے۔
اسلام آباد ہائیکورٹ کے باہر میڈیا سے گفتگو کرتے ہوئے بیرسٹر علی ظفر نے کہا کہ ہم پرامن اور ذمہ دار قوم ہیں، ہمارا مقابلہ مودی کی انتہا پسند حکومت سے ہے، بھارتی عوام دشمن نہیں، ہم ہمسائیگی کے حق میں ہیں، جنگ نہیں چاہتے لیکن اگر کسی نے حملہ کیا تو منہ توڑ جواب دیں گے۔
انہوں نے کہا کہ بھارتی وزیراعظم مودی نے اپنی فوج کو فری ہینڈ دیدیا مگر شہباز شریف نے تاحال پاک فوج کو فری ہینڈ نہیں دیا۔ انہوں نے کہا کہ بانی پی ٹی آئی کا موقف آج بھی وہی ہے ،ہم پاکستان کے ساتھ کھڑے ہیں، قوم پر حملہ ہوا تو جان بھی حاضر ہے۔
انہوں نے کہا کہ حکومت نے اے پی سی میں بانی پی ٹی آئی کی آواز شامل نہیں کی جبکہ انڈیا میں کانگریس کی درخواست پر مشترکہ اجلاس بلایا گیا۔ انہوں نے کہا کہ اپوزیشن نے یکجہتی کا پیغام دیا لیکن حکومت ابھی سیاست کھیل رہی ہے، مریم نواز کی تقریر میں بھارت کا ذکر تک نہیں تھا۔
