اسلام آباد: وزیراعظم شہباز شریف نے پاکستا ن کو ڈیجیٹل سٹارٹ اپس اور سرمایہ کاری کیلئے موزوں ترین مارکیٹ قرار دیتے ہوئے کہا ہے کہ ملک کی نوجوان افرادی قوت کو ڈیجیٹل ہنر و تربیت سے لیس کرنا اولین ترجیحات میں شامل ہے۔جار ی بیان کے مطابق بدھ کو ڈیجیٹل تعاون تنظیم کی سیکرٹری جنرل دیمہ الیحیی نے وزیراعظم شہباز شریف سے ملاقات کی۔
اس موقع پر وفاقی وزیر آئی ٹی شزا فاطمہ ، مشیر سید توقیر شاہ اور متعلقہ اعلی حکام بھی موجود تھے۔ وزیراعظم نے کہا کہ بھر سے ایک ہزار سے زائد جدید ٹیکنالوجی کے سرمایہ کاروں اور پالیسی سازوں کا پاکستان میں جمع ہونا خطے میں پاکستان کے ڈیجیٹل شعبے میں بڑھتے اثر و رسوخ کی علامت ہے۔
انہوں نے کہا کہ پاکستان کا سب سے قیمتی اثاثہ ہماری نوجوان افرادی قوت ہے جسے ڈیجیٹل ہنر و تربیت سے لیس کرنا ہماری اولین ترجیحات میں شامل ہے، حکومت کی کاروبار دوست پالیسیاں اور سرمایہ کاروں کی دی جانیوالی سہولیات کا مقصد ملک میں سرمائے کیساتھ ساتھ جدید ٹیکنالوجی کی منتقلی بھی ہے۔
وزیراعظم نے بتایا کہ ہم ڈیجیٹل ٹیکنالوجی اور سرمایہ کاری کے ایسے منصوبے لا رہے ہیں جو نوجوان افرادی قوت کو اپنی توانائیوں کو صحیح سمت میں بروئے کار لانے ،انہیں باعزت روزگار کی فراہمی سے معیشت میں اپنا کلیدی کردار ادا کرنے میں معاونت کریں گے۔
وزیراعظم نے کہا کہ ڈیجیٹل تبدیلی اب کوئی معمولی رجحان نہیں بلکہ ایک ایسا انقلاب ہے جو معیشتوں کو نئی شکل دے رہا ہے، حکومت عالمی سطح پر وقوع پذیر ہونیوالی ڈیجیٹل تبدیلی کیساتھ پاکستان کو ہم آہنگ کرنے کیلئے ہر ممکن اقدام کر رہی ہے۔ انہوں نے کہا کہ ڈیجیٹل شعبے میں براہ راست غیر ملکی سرمایہ کاری کا یہ فورم ،شاندار تقریب اور عالمی شرکت اس امر کا ثبوت ہے کہ پاکستان عالمی ڈیجیٹل معیشت میں قائدانہ کردار کی صلاحیتوں کا حامل ہے۔ڈیجیٹل تعاون تنظیم کی سیکرٹری جنرل دیمہ بنت الیحیی نے پاکستان میں پہلے ڈیجیٹل شعبے کے براہ راست غیر ملکی سرمایہ کاری فورم کے انعقاد پر شکریہ ادا کرتے ہوئے کہا کہ اسلام آباد میں منعقد ہ فورم کے پہلے اجلاس میں شرکت انتہائی اعزاز ہے۔
