انطالیہ: وزیر اعلی پنجاب مریم نواز نے ترکیہ کے نائب صدر کو پنجاب کے دورے کی دعوت دیتے ہوئے کہا ہے کہ ترکیہ پاکستان دو بھائی ہیں۔ ان خیالات کا اظہار انہوں نے ترکیہ کے نائب صدر جودت یلماز سے ملاقات کے دوران کیا ۔یہ ملاقات ترکیہ میں ہونے والے ڈپلومیسی فورم 2025 کانفرنس کی سائیڈ لائنز پرہوئی۔جس میں دونوں ممالک کے درمیان مشترکہ تعلیمی منصوبوں اور معاشی شراکت داری کو فروغ دینے پر اتفاق کیا گیا۔
جودت یلماز نے فورم میں شرکت پر وزیر اعلی پنجاب کا شکریہ ادا کیا۔دونوں رہنماں نے پاکستان اور ترکیہ کے دوطرفہ دلچسپی کے امور اور تعاون بڑھانے پر گفتگو کی، جبکہ معاشی امکانات، تجارت، تعلیم اور ہنر کی ترقی پر مشترکہ کاوشوں پر تبادلہ خیال کیا، مشترکہ تعلیمی منصوبوں اور معاشی شراکت داری کو فروغ دینے پر اتفاق کیا گیا۔ دونوں رہنماوں نے ہنر مند افرادی قوت اور گلوبل سکل میپنگ میں تعاون پر بات چیت کی، مریم نواز نے نائب صدر ترکیہ کو صوبہ پنجاب میں تعلیم اور ہنر کی ترقی کے اپنے منصوبوں سے آگاہ کیا۔ مریم نواز نے سابق وزیراعظم محمد نواز شریف اور وزیراعظم شہباز شریف کی طرف سے ترکیہ کے نائب صدر کے لئے نیک تمناوں کا پیغام پہنچایا۔
