اسلام آباد: وزیراعظم شہباز شریف نے امیرقطر شیخ تمیم بن حمد الثانی کو عید کی مبارکباد دیتے ہوئے دیرینہ برادرانہ تعلقات پر اظہار اطمینان جبکہ تمام شعبوں میں دوطرفہ تعاون کے فروغ کے عزم کا اعادہ کیا ہے۔جاری بیان کے مطابق وزیراعظم شہباز شریف نے امیر قطر شیخ تمیم بن حمد الثانی سے ٹیلیفونک رابطہ کیا اور انہیں عیدالفطر کے پرمسرت موقع پر دلی مبارکباد پیش کی۔
دونوں رہنماؤں کے درمیان اہم عالمی و علاقائی امور پر گفتگو ہوئی، وزیر اعظم نے غزہ میں قیام امن کیلئے امیر قطر کے سرگرم وموثر کردار اور خصوصی کوششوں کی تعریف کی۔وزیراعظم نے پاکستان اور قطر کے درمیان قریبی و دیرینہ برادرانہ تعلقات پر اطمینان کا اظہار کرتے ہوئے سیاسی، اقتصادی، اور ثقافتی سمیت تمام شعبوں میں دوطرفہ تعاون کو مزید فروغ دینے کے عزم کا اعادہ کیا۔بیان کے مطابق شیخ تمیم بن حمد الثانی نے وزیراعظم کی جانب سے عید کی مبارکباد قبول کرتے ہوئے پاکستانی عوام کیلئے نیک تمناؤں کا اظہار کیا۔
امیر قطر نے وزیر اعظم کے دورہ قطر کے دوران منظر آرٹ گیلری کی افتتاحی تقریب میں بطور مہمان خصوصی شرکت پر اظہار تشکر کیا جبکہ وزیر اعظم نے نمائش کے انعقاد اور خصوصی دعوت پر امیر قطر و عالی مرتبت شیخہ المیاسہ کا شکریہ ادا کیا۔
امیر قطر نے وزیراعظم کو بتایا کہ پاکستان میں قطری سرمایہ کاری و نجی شعبے کے تعاون کے فروغ کیلئے اعلی سطح قطری وفد عید کے فوری بعد پاکستان کا دورہ کرے گا۔وزیر اعظم نے پاکستان قطر ثقافتی تعاون ،دونوں ممالک کے مابین دیرینہ تعلقات کی تاریخ پر لاہور میں نمائش کے انعقاد کی تجویز دی جس کا امیر قطرنے خیر مقدم کیا۔وزیر اعظم نے شیخ تمیم بن حمد الثانی کو جلد دورہ پاکستان کی دعوت بھی دی۔
