اترپردیش: بھارت میں بیویوں کی جانب سے اپنے شوہروں کو قتل کرنے کے واقعات میں اضافہ ہو گیا ، ایک شخص نے موت کے خوف سے خود ہی اپنی بیوی کی شادی اس کے آشنا سے کروا دی ۔بھارتی میڈیا کے مطابق بھارتی ریاست اتر پردیش کے ضلع سنت کبیر نگر کے گاوں کٹار جوٹ کے رہائشی ببلو نامی شخص نے 2017 میں گورکھ پور ضلع سے تعلق رکھنے والی رادھیکا نامی لڑکی سے شادی کی تھی اور ان کے 2 بچے ہیں۔ ببلو دوسری ریاست میں مزدوری کرتا ہے اور اسے پتہ چلا کہ اس کی بیوی کا تقریبا ڈیڑھ سال سے اس کے گاوں کے وکاس نامی شخص کے ساتھ معاشقہ چل رہا تھا۔
ببلو نے اپنی بیوی کو بتائے بغیر گاوں واپس آنے کا فیصلہ کیا اور پھر معلومات کی تصدیق کرنا شروع کر دیں۔گاں کے رہائشیوں کے مطابق شک کی تصدیق ہونے پر ببلو نے اپنی بیوی سے جھگڑا یا بحث نہیں کی، اس نے گاوں کے بزرگوں کو اس معاملے سے آگاہ کیا اور فیصلہ کیا کہ خاتون اپنی پسند کے لڑکے سے شادی کر لے۔
بھارتی میڈیا کے مطابق ببلو نے رادھیکا کی شادی ہندو رسم و رواج کے مطابق مندر میں کرائی اور گواہ بن کر عدالت میں شادی کو قانونی طور پر درج بھی کرایا۔یہی نہیں ببلو نے رادھیکا کے ساتھ اپنے دونوں بچوں کو بھی اپنے ساتھ رکھنے کا فیصلہ کیا اور کہا کہ وہ اکیلے ہی ان کی پرورش کرے گا۔
بھارتی میڈیا نے ببلو سے ایسا کرنے کی وجہ پوچھی تو اس نے جواب دیا کہ میں نے خود کو ممکنہ نقصان سے بچانے کے لیے ان کی شادی کرانے کا فیصلہ کیا۔ببلو نے کہا کہ حال ہی میں ہم نے ایسے واقعات دیکھے جن میں شوہروں کو ان کی بیویوں نے قتل کیا، میرٹھ میں جو کچھ ہوا اسے دیکھنے کے بعد میں نے اپنی بیوی کی شادی کرانے کا فیصلہ کیا تاکہ ہم دونوں سکون سے رہ سکیں۔
