کوئٹہ: وزیراعلی بلوچستان میر سرفراز بگٹی نے کلمت میں دہشت گردی واقعے کی مذمت کرتے ہوئے کہا ہے کہ شناخت کے بعد مسافروں کا قتل درندگی اور ناقابل معافی جرم ہے،سیاسی مقاصد کیلئے احتجاج اور دھرنوں کی کال دینے والے سفاکانہ حملے پر کیوں خاموش ہیں؟۔
جاری بیان میں میر سرفراز بگٹی نے کلمت میں بس فائرنگ واقعے میں 6 افراد کی ہلاکت کی شدید مذمت کرتے ہوئے کہا ہے کہ جاں بحق افراد کے لواحقین کے غم میں برابر کا شریک ہوں۔ انہوں نے کہا کہ دہشت گردوں نے بلوچستان کی روایات، مہمان نوازی اور امن پسندی کو پامال کر دیا،شر پسندوں نے معصوم اور بے گناہ شہریوں کو نشانہ بنا کر وحشیانہ فعل انجام دیا، شناخت کے بعد مسافروں کو قتل کرنا درندگی اور ناقابل معافی جرم ہے۔ انہوں نے کہا کہ دہشت گردی کے خلاف قوم کے غیر متزلزل عزم کو ایسی کارروائیوں سے کمزور نہیں کیا جا سکتا۔
انہوں نے کہا کہ سیاسی مقاصد کیلئے احتجاج اور دھرنوں کی کال دینے والے سفاکانہ حملے پر کیوں خاموش ہیں؟ ،بیگناہ مزدوروں کے قتل پر معنی خیز خاموشی رکھنے والے کس کی حمایت کر رہے ہیں؟ خاموشی کو رضا مندی سمجھا جاتا ہے، یہ ثابت ہو رہا ہے کون کس کا سہولت کار ہے؟۔ انہوں نے کہا کہ ہارڈ کور دہشت گردوں کے خلاف بھرپور جنگ جاری رہے گی ۔
