لاہور: امیر جماعت اسلامی پاکستان حافظ نعیم الرحمن نے بلوچستان میں ٹرین کو یرغمال بنانے کے واقعے پر گہری تشویش کا اظہار کرتے ہوئے کہا ہے کہ یرغمالیوں کی باحفاظت واپسی حکومت کی اولین ترجیح ہونی چاہیے، جماعت اسلامی بار بار حالات کی سنگینی کی نشاندہی کرتی رہی لیکن حکمران طبقہ سنجیدگی اختیار کرنے کے بجائے صرف بڑھکیں مارتا رہا۔
انہوں نے اس بات پر زور دیا کہ بلوچستان میں دیرپا امن کے قیام کے لیے ایک موثر قومی لائحہ عمل تشکیل دینا ہوگا، کیونکہ اسی کے ذریعے دہشت گردی کے خاتمے کو ممکن بنایا جا سکتا ہے۔ حافظ نعیم الرحمن نے کہا کہ بلوچستان کے عوام کے حقیقی مسائل کو حل کرنا ناگزیر ہو چکا ہے،بلوچ نوجوانوں کو قومی دھارے میں شامل کرنا ہوگا تاکہ احساس محرومی کا خاتمہ کیا جا سکے۔
