اسلام آباد: رہنماء پی ٹی آئی عمر ایوب نے کہا ہے کہ چیف جسٹس کو بتایا ہے عمران خان، بشری بی بی کے حقوق جان بوجھ کر سلب کئے جارہے ہیں، پی ٹی آئی کارکنان کیساتھ پولیس گردی ہو رہی ہے، عمران خان واحد سابق وزیراعظم جن کا جیل ٹرائل ہو رہا ہے،اس وقت جو حالات لوئر جوڈیشر میں ہیں تو آگے جا کر کیا ہوگا؟۔
جوڈیشل کمپلیکس کے باہر میڈیا سے گفتگو کرتے ہوئے عمر ایوب نے کہا کہ چیف جسٹس نے مجھے بطور اپوزیشن لیڈر بلایا تھا۔ انہوں نے بتایا کہ بانی پی ٹی آئی عمران خان سے بیرسٹر علی ظفر اور شبلی فراز کے ہمراہ ملاقات میں تین بار چیف جسٹس سے ملاقات بارے پوچھا جس پر انہوں نے کہا کہ ملاقات کرلیں۔
انہوں نے کہا کہ ہم نے اپنا ایجنڈا چیف جسٹس کے سامنے بھیجا تھا، اس میں ہیومن رائٹس اور جوڈیشل ریفارمز کی بات کی گئی تھی، ہم نے چیف جسٹس سے کہا بانی پی ٹی آئی اور بشری بی بی اس وقت جیل میں ہیں، انہیں بتایا کہ بانی پی ٹی آئی اور بشری بی بی کے حقوق جان بوجھ کر سلب کئے گئے ہیں ۔ انہوں نے کہا کہ ہم نے چیف جسٹس کو بتایا کہ ہماری ملاقاتیں نہیں کرائی جاتیں نہ ہی بانی پی ٹی آئی سے ان کے بیٹوں کی ملاقات کرائی جاتی ہے۔
انہوں نے کہا کہ اس وقت جو حالات لوئر جوڈیشری میں ہیں تو آگے جاکر کیا ہوگا؟۔ انہوں نے کہا کہ بانی پی ٹی آئی واحد سابق وزیراعظم ہیں جن کا جیل ٹرائل ہو رہا ہے جبکہ دیگر سابق وزرائے اعظم کا اوپن کورٹس میں ٹرائل ہوتا رہا ہے۔ انہوں نے کہا کہ ہم نے چیف جسٹس کو بتایا ہے کہ پی ٹی آئی کے کارکنان کیساتھ پولیس گردی ہو رہی ہے، پنجاب میں ،اسلام آباد میں، سندھ میں اور بلوچستان میں پی ٹی آئی رؤہنماں کو تنگ کیا جا رہا ہے۔
