اسلام آباد: وفاقی وزیر منصوبہ بندی احسن اقبال نے کہا ہے کہ وعدوں کو عملی جامہ پہنانے کیلئے کارکردگی و رفتار میں 200فیصد اضافہ کرنا ہوگا، قومی ترقی میں موثر کردار ادا کرنے کیلئے وزارت منصوبہ بندی کو نئے دور کے تقاضوں سے ہم آہنگ کرنا ناگزیر ہے ،مطلوبہ معیار پر پورا نہ اترنے والے سیکشن چیفس کو عہدوں سے الگ کیا جائے، افسران پاکستان کا مستقبل مزید روشن و مستحکم بنانے کیلئے کارکردگی، محنت و شفافیت کو اپنا شعار بنائیں۔
ہفتے کو وفاقی وزیراحسن اقبال کی زیر صدارت وزارت منصوبہ بندی، ترقی و خصوصی اقدامات میں اداراجاتی اصلاحات بارے اجلاس کا انعقاد ہوا جس میں سیکرٹری پلاننگ، ممبران پلاننگ کمیشن ڈاکٹر ندیم جاوید، چیئرمین پاکستان انسٹی ٹیوٹ آف ڈویلپمنٹ اکنامکس اور وزارت منصوبہ بندی کے سینئر افسران نے شرکت کی۔
وفاقی وزیر نے اجلاس سے خطاب کرتے ہوئے کہا کہ وزارت منصوبہ بندی کو جدید دور کے تقاضوں سے ہم آہنگ فعال ادارہ بنانا وقت کی اہم ضرورت ہے جہاں میرٹ اور کارکردگی کی بنیاد پر فیصلہ سازی ہو۔انہوں نے کہا کہ پلاننگ کمیشن کو ڈاکٹر محبوب الحق اور سرتاج عزیز جیسے اعلی معیار کے ٹیکنیکل شعبوں کے چیف درکار ہیں جو قومی پالیسی سازی میں اپنے اپنے شعبوں کو فکری قیادت فراہم کر سکیں۔
انہوں نے کہا کہ وزارت کے اندر افسران کی پروموشن خالصتا کارکردگی اور تعلیم کی بنیاد پر کی جائے،تمام سیکشن چیفس کی کارکردگی و اہلیت کی پڑتال کیلئے ماہرین پر مشتمل کمیٹی تشکیل دی جائے اور جو چیف مطلوبہ معیار پہ نہ اترتے ہوں ان کو متبادل عہدوں پہ بھیجا جائے۔
انہوں نے کہا کہ پلاننگ کمیشن میں ملک اور بیرون ملک سے بہترین ٹیلنٹ اکٹھا کیا جائیگا چونکہ پلاننگ کمیشن نے ملک کے مستقبل کی منصوبہ بندی کرنی ہے۔ انہوں نے کہا کہ دنیا کی بہترین یونیورسٹیوں میں زیر تعلیم پاکستانی سٹوڈنٹس کو موسم گرما کی تعطیلات میں انٹرن شپ پروگرام فراہم کیا جائے گا۔انہوں نے وزارت میں ڈیجیٹیلائزیشن عمل کو تیز کرنے کی ہدایت دی۔
اجلاس میں وزارت منصوبہ بندی کے تکنیکی شعبوں، آئی ٹی ونگ اور پراجیکٹس ونگ کو مربوٹیکنیکل پلانر گروپ کے تحت ضم کرنے کی تجویز زیر غور آئی جس کا مقصد وزارت کی کارکردگی کو مزید موثر بنانا ہے، گروپ کے تحت گریڈ 17کی تمام بھرتیاں فیڈرل پبلک سروس کمیشن کے ذریعے اوپن کمپی ٹیشن پر کی جائیں گی تاکہ شفافیت اور میرٹ کی بنیاد پر تقرریوں کو یقینی بنایا جا سکے۔
اجلاس میں افسران کی ترقی اور تبادلوں کیلئے ہوریزونٹل اور ورٹیکل موومنٹ کی سہولت فراہمی پر بھی غور کیا گیا تاکہ استعداد کار میں اضافہ ہو اور افسران کو مزید مواقع میسر آئیں۔اجلاس میں پاکستان پلاننگ اینڈ مینجمنٹ انسٹیٹیوٹ میں دو ماہ کا انڈکشن کورس متعارف کرانے کی بھی تجویز پیش کی گئی جس کے بعد فائنل پاسنگ آؤٹ ایگزام لیا جائے گا تاکہ افسران کی پیشہ ورانہ مہارت کو جانچا جا سکے۔وفاقی وزیر نے کہا کہ اگر ہم نے واقعی اپنے وعدوں کو عملی جامہ پہنانا ہے، تو ہمیں اپنی کارکردگی اور رفتار میں 200فیصد اضافہ کرنا ہوگا۔
انہوں نے کہا کہ سستی، کاہلی، نا اہلی اور کرپشن کیلئے زیرو ٹالرنس ہے۔انہوں نے کہا کہ وزارت منصوبہ بندی ڈیجیٹل ٹرانسفارمیشن، استعداد کار میں اضافے، پبلک پرائیویٹ پارٹنرشپ، عالمی معیارات سے ہم آہنگی، اور ڈیٹا پر مبنی فیصلہ سازی پر توجہ مرکوز کرے گی۔انہوں نے کہا کہ پاکستان کے پاس ترقی کی تمام تر صلاحیتیں موجود ہیں، ضرورت صرف انتھک محنت اور درست سمت میں کام کرنے کی ہے۔
انہوں نے کہا کہ قومی ترقی میں موثر کردار ادا کرنے کیلئے وزارت منصوبہ بندی کو نئے دور کے تقاضوں سے ہم آہنگ کرنا ناگزیر ہے ۔ انہوں نے کہا کہ پاکستان کا مستقبل مزید روشن و مستحکم بنانے کیلئے تمام افسران کارکردگی، محنت اور شفافیت کو اپنا شعار بنائیں ۔
