اسلام آباد: وزیراعظم شہباز شریف نے کہا ہے کہ امن اور بحران دونوں وقتوں میں تربیت یافتہ سکاؤٹس کا کردار گرانقدر رہا ہے،امن کا پیامبر جیسے اقدامات سکاؤٹس کو اتحاد، ہم آہنگی ،بامعنی سماجی اثرات کو فروغ دینے کیلئے طاقتور پلیٹ فارم فراہم کرتے ہیں ، سکاؤٹ تحریک سے نوجوانوں کو سکاؤٹنگ اقدار اپنانے ،قومی خدمت کیلئے خود کو وقف کرنے کی ترغیب ملے گی۔
سکاؤٹس کے عالمی دن پرجاری بیان میں وزیراعظم شہباز شریف نے کہا کہ پاکستان اور دنیا بھر کے سکاؤٹس کو دل کی گہرائیوں سے مبارکباد پیش کرتا ہوں آج کے دن ہم قیادت، برادری اور خدمت کے جذبے کو منا رہے ہیں جو پوری تحریک کی بنیاد ہے۔ انہوں نے کہا کہ ہر سال 22فروری کو دنیا بھر میں سکاؤٹس،سکاؤٹنگ کی تحریک کے بانی لارڈ رابرٹ سٹیفنسن سمتھ بیڈن پاول کی میراث کو عقیدت سے یاد کرتے ہیں۔
انہوں نے کہا کہ پاکستان بوائے سکاؤٹس ایسوسی ایشن کی تاریخ میں نمایاں کارکرگی ہے بالخصوص جب یہ اپریل 2025میں 15ویں نیشنل جمبوری کی تیاری کر رہی ہے باعث مسرت ہے۔
انہوں نے کہا کہ اپنے وژن 2030ء اور ورلڈ سکاؤٹ بیورو کے ایشیا پیسیفک ریجن کیساتھ تعاون سے ایسوسی ایشن عالمی شراکت کو مضبوط بنانے، پاکستان کیلئے عالمی سطح پر بہترین پریکٹسز کے تبادلے اور پاکستان کی عالمی سکاؤٹنگ کیلئے خدمات کو نمایاں کرنے کیلئے تیار ہے۔
انہوں نے کہا کہ امن اور بحران دونوں وقتوں میں تربیت یافتہ سکاؤٹس کا کردار گرانقدر رہا ہے،سکاؤٹس، سکاؤٹنگ کے نصب العین کی جیتی جاگتی مثال ہیں جو کہتا ہے لچک، قیادت اور بے لوث خدمت کا مظاہرہ کرتے ہوئے تیار رہو۔ وزیراعظم نے کہا کہ بابائے قوم قائداعظم محمد علی جناح نے سکاؤٹنگ کی اہمیت کا اعتراف کرتے ہوئے اس بات پر زور دیاتھا کہ ایک محفوظ، صاف ستھری اور ترقی یافتہ دنیا کی تعمیر کے لیے، ہمیں فرد سے شروعات کرنی چاہئے۔
آئیے ہم اس فرد کو نوجوانی میں ہی تیار کریں اور اس کے اندر سکاؤٹنگ کے نصب العین کے مطابق اپنی ذات سے بالا تر ہوکر خدمت، سوچ، قول اور عمل میں پاکیزگی پیدا کریں۔ انہوں نے کہا کہ مستقبل میں اس تحریک میں ہمیں جدید و پرکشش اقدامات کا نفاذ کرنا ہوگا جو نوجوان ذہنوں کو چیلنج، تحریک و جدت کو فروغ اور کردار کو مضبوط کریں۔
امن کا پیامبر جیسے اقدامات سکاؤٹس کو اتحاد، ہم آہنگی اور بامعنی سماجی اثرات کو فروغ دینے کیلئے ایک طاقتور پلیٹ فارم فراہم کرتے ہیں جو انہیں عالمی شہری بننے کی ترغیب دینے کیساتھ معاشرے میں مثبت کردار ادا کرتے ہیں۔ انہوں نے کہا کہ مجھے پوری امید ہے پاکستان میں سکاؤٹ تحریک یونہی فروغ پاتی رہے گی جس سے ہر لڑکے اور لڑکی کو سکاؤٹنگ کی اقدار کو اپنانے اور قوم کی خدمت کیلئے خود کو وقف کرنے کی ترغیب ملے گی۔
