لاہور: وفاقی وزیر منصوبہ بندی احسن اقبال نے کہا ہے کہ پاکستان پھر اڑان بھرنے کو تیار ہے، ہمیں اپنے اطوار بدلنا ہوں گے، امن ،استحکام ،پالیسی کا تسلسل اور اصلاحات پر عمل کا عزم ضروری ہے، ہم نے اگلے سنگ میل پر نظر رکھنی ہے۔
لاہور میں نیشنل سکول آف پبلک پالیسی کی سالانہ تقریب سے خطاب کرتے ہوئے احسن اقبال نے کہا کہ جو اکنامک زونز ہم نے 2020ء میں تیار کرنے تھے ،2022میں جب آئے تو ایک بھی تیار نہیں ہوا تھا ۔ انہوں نے کہا کہ حکومت ملی تو دنیا میں شرطیں لگ رہی تھیں کہ پاکستان 6ہفتوں میں سری لنکا بن جائے گا مگر وزیراعظم شہبازشریف نے دلیرانہ طریقے سے فیصلے کئے، پاکستان آج دوبارہ ٹرن آراؤنڈ پر آگیا ہے۔
انہوںنے کہا کہ مہنگائی 38فیصد سے 4فیصد پرآگئی ہے، پالیسی ریٹ 12فیصد پر آگیا ہے، سٹاک مارکیٹ نئے ریکارڈ قائم کررہی ہے، ملک ایک بار پھر اڑان بھرنے کیلئے تیار ہے۔انہوں نے کہا کہ ہم نے فیصلہ کرنا ہے کہ کیا اس اڑان کا حشر بھی پچھلی اڑانوں جیسا کرنا ہے؟ ہمیں اپنے اطوار بدلنا ہوں گے۔
انہوں نے کہا کہ امن ،استحکام ،پالیسی کا تسلسل اور اصلاحات پر عمل کا عزم بہت ضروری ہے، ہم نے اگلے سنگ میل پر نظر رکھنی ہے۔
