بیجنگ (شِنہوا) چین کی وزارت خزانہ اور وزارت ہنگامی انتظام نے پیر کے روز قدرتی آفات سے متعلق مرکزی امدادی فنڈ سے 18 کروڑ یوآن (تقریباً 2 کروڑ 65 لاکھ 20 ہزار امریکی ڈالر) مختص کئے تاکہ ملک بھر میں آفات سے متاثرہ علاقوں کی مدد کی جا سکے۔
یہ اقدام ایسے وقت اٹھایا گیا ہے جب چین کے مشرقی علاقے سال کے 13ویں سمندری طوفان ’’ڈولفن‘‘ کے باعث شدید بارشوں اور سنگین سیلاب سے نمٹ رہے ہیں، جبکہ چین کے بعض شمال مغربی علاقے بدستور طویل خشک سالی کا سامنا کر رہے ہیں۔
مجموعی رقم میں سے 12 کروڑ یوآن 5 صوبوں جیانگسو، ژے جیانگ، آنہوئی، فوجیان اور جیانگ شی کے لئے مختص کئے گئے ہیں تاکہ سیلاب اور سمندری طوفان سے ہونے والے نقصانات کے بعد ہنگامی ردعمل اور امدادی کارروائیوں میں مدد دی جا سکے۔
یہ رقم بنیادی طور پر تلاش اور بچاؤ کی کارروائیوں، متاثرہ افراد کے انخلا اور ان کے لئے عارضی پناہ گاہوں کے انتظام، خطرات کو کم کرنے اور فوری طور پر خطرناک مقامات کو محفوظ بنانے، ثانوی آفات کی روک تھام کے لئے حفاظتی معائنے اور متاثرہ و منہدم ہونے والے مکانات کی مرمت پر خرچ کی جائے گی۔
باقی 6 کروڑ یوآن اندرونی منگولیا، سنکیانگ اور سنکیانگ پروڈکشن اینڈ کنسٹرکشن کور کے لئے مختص کئے گئے ہیں تاکہ جاری خشک سالی کی صورتحال سے نمٹا جا سکے۔
