لاہور (لارڈ میڈیا): پاکستان کی قومی مردوں کی فٹبال ٹیم اس سال پہلی بار فیفا کی طرف سے منظور شدہ ایونٹ میں شرکت کرے گی۔ پاکستان فٹبال فیڈریشن (پی ایف ایف) نے تصدیق کی ہے کہ ٹیم ستمبر اور اکتوبر میں ہونے والے فیفا آسیان کپ میں حصہ لے گی۔
یہ ایونٹ انڈونیشیا میں منعقد ہوگا جہاں پاکستان کے علاوہ ملائیشیا، بھارت، فلپائن، سنگاپور اور تھائی لینڈ سمیت آٹھ ٹیمیں شرکت کریں گی۔ پاکستان کو خصوصی دعوت پر شامل کیا گیا ہے جبکہ باقی ٹیمیں جنوب مشرقی ایشیا سے ہیں۔
پی ایف ایف کے صدر سید محسن گیلانی نے فیفا کے صدر جیانی انفانٹینو کا شکریہ ادا کرتے ہوئے کہا کہ یہ موقع پاکستان کے لیے تاریخی اہمیت کا حامل ہے۔ انہوں نے مزید بتایا کہ خواتین کی ٹیم کے بعد مردوں کی ٹیم بھی فیفا کے ایونٹ میں شرکت کر رہی ہے۔
گیلانی نے کہا کہ اس ٹورنامنٹ سے قومی ٹیم کو مضبوط حریفوں کے خلاف کھیلنے کا موقع ملے گا اور بین الاقوامی سطح پر اپنی صلاحیتوں کا اظہار کرنے کا بہترین موقع فراہم کرے گا۔ انہوں نے عزم ظاہر کیا کہ پاکستان اب ترقیاتی مقابلوں تک محدود نہیں رہے گا بلکہ بڑی ٹیموں کا مقابلہ کرنے کے لیے تیار ہے۔
