لاہور: وزیراعلی پنجاب مریم نواز نے کہا ہے کہ مشکلات ،چیلنجز کے باوجود امید کا دامن نہیں چھوڑنا چاہئے، ہمت سے امید کی روشنی یقین کا تمتماتا سورج بن جاتی ہے۔امید کے عالمی دن پر جاری بیان میں مریم نواز نے کہا کہ امید ایسا جذبہ ہے جو ہمیں آگے بڑھنے کی طاقت دیتا ہے،ہمت وحوصلہ کریں تو امید کی روشنی یقین کا تمتماتا سورج بن جاتی ہے۔
انہوں نے کہا ہے کہ مشکلات اور چیلنجز کے باوجود امید کا دامن کبھی نہیں چھوڑنا چاہئے، امید ہے فلسطین اور کشمیر کے عوام کے لئے جلد آزادی کا سورج طلوع ہو گا۔
انہوں نے کہا کہ مسلم لیگ (ن) عوام کی امید بن چکی ہے، قوم کی امیدوں پر پورا اترنے کیلئے دن رات کوشش کر رہے ہیں۔ انہوں نے کہا کہ پنجاب کے ہر بچے کو لیپ ٹاپ، ہونہار سکالر شپ اور بہترین تعلیم ملے گی، امید ہے پنجاب میں ہر بے گھر کو اپنی چھت کا سکھ ملے گا، پنجاب کا ہر کسان لہلہاتی فصلیں دیکھ کر خوش ہو گا۔
