بیجنگ(شِنہوا) چین نے ملک بھر میں ایک باضابطہ مہم شروع کی ہے جس کا مقصد مہاجر اور والدین سے محروم یا پیچھے رہ جانے والے بچوں کا ریکارڈ تیار کرنا ہے تاکہ فلاحی خدمات کو زیادہ موثر اور درست بنایا جا سکے۔
مقامی حکام کو ہدایت کی گئی ہے کہ وہ موجودہ ڈیٹا بیس کو بہتر بنائیں، مختلف اداروں کے درمیان موجود معلوماتی رکاوٹوں کو ختم کریں اور زمینی سطح پر جامع تصدیقی کارروائیاں انجام دیں۔
وزارت شہری امور کے حکام کی قیادت میں جاری سرکاری نوٹیفکیشن کے مطابق ڈیٹا اپڈیٹ کرنے کی یہ جامع مہم ستمبر کے آخر تک مکمل کی جائے گی، جو وزارت شہری امور کی قیادت میں جاری کی گئی ہے۔
نوٹیفکیشن میں کہا گیا ہے کہ خصوصی توجہ سب سے زیادہ کمزور بچوں پر دی جائے گی، خاص طور پر وہ مہاجر بچے جو روزمرہ زندگی، تعلیم یا طبی سہولیات میں مشکلات کا سامنا کر رہے ہیں اور وہ بچے جو مناسب سرپرستی کے بغیر پیچھے رہ گئے ہیں۔
ان تمام بچوں کا ریکارڈ ایک متحرک ’’ایک بچہ، ایک فائل‘‘ نظام کے تحت رکھا جائے گا تاکہ کوئی بچہ نظر انداز نہ ہو سکے۔
ان ریکارڈز کو موثر رکھنے کے لئے دیہات اور کمیونٹیز کو ماہانہ گھریلو دورے کرنے کی ہدایت دی گئی ہے جبکہ ڈیٹا کو تحصیل یا ضلعی سطح پر ہر 3 ماہ بعد اپڈیٹ کیا جائے گا اور کاؤنٹی سطح کے ادارے اس کا جائزہ لیں گے۔
نوٹیفکیشن کے مطابق مہاجر بچوں کے لئے پالیسی کا مقصد یہ ہے کہ انہیں عوامی خدمات تک مساوی رسائی دی جائے تاکہ وہ تعلیم، صحت اور شہری نظام میں پیچھے نہ رہ جائیں۔
