چھانگ شا (شِنہوا) چین کے وسطی صوبے ہونان میں تمام آتش بازی کا سامان بنانے والی کمپنیوں کو ممکنہ حفاظتی خطرات کے خاتمے کے لئے پیداوار فوری طور پر معطل کرنے اور مکمل حفاظتی جائزہ لینے کا حکم دیا گیا ہے۔
صوبائی ایمرجنسی مینجمنٹ ڈیپارٹمنٹ کے مطابق یہ اقدام پیر کے روز صوبائی دارالحکومت چھانگ شا کے زیر انتظام شہر لیویانگ میں آتش بازی کا سامان بنانے والی فیکٹری میں ہونے والے دھماکے کے بعد کیا گیا جس میں 26 افراد ہلاک اور 61 دیگر زخمی ہو گئے تھے۔
لیویانگ کو چین کا آتش بازی کے سامان کا مرکز کہا جاتا ہے۔ اس شہر میں آتش بازی کا سامان تیار کرنے والی 400 سے زائد کمپنیاں موجود ہیں جن کی سالانہ پیداوار 2025 میں 50 ارب یوآن (تقریباً 7.29 ارب امریکی ڈالر) سے تجاوز کر گئی۔ چین کی آتش بازی کے سامان کی مجموعی برآمدات میں اس شہر کا حصہ تقریباً 70 فیصد ہے۔
