اسلام آباد (شِنہوا) امریکی قبضے میں لئے گئے ایرانی جہاز "توسکا” کے عملے کے 15 ارکان کو پیر کے روز بلوچستان کے ضلع گوادر میں سرحدی مقام پر ایرانی حکام کے حوالے کر دیا گیا۔
گوادر کے ڈپٹی کمشنر نقیب اللہ کاکڑ نے شِنہوا سے گفتگو کرتے ہوئے تصدیق کی کہ یہ منتقلی ساحلی ضلع میں واقع گبد-رمدان سرحدی گزرگاہ پر کی گئی جو ایران سے ملتی ہے۔
کاکڑ نے شِنہوا کو بتایا کہ ضروری انتظامات اور دونوں فریقین کے درمیان ہم آہنگی کے بعد عملے کے ان ارکان کو باضابطہ طور پر ایرانی حکام کے حوالے کیا گیا۔
یہ 15 افراد ان 22 ایرانی شہریوں کے گروپ کا حصہ ہیں جنہیں گزشتہ ماہ امریکی قبضے میں لئے گئے ایک کنٹینر بردار جہاز پر حراست میں لینے کے بعد پاکستان منتقل کیا گیا تھا۔
سکیورٹی ذرائع نے نام ظاہر نہ کرنے کی شرط پر شِنہوا کو بتایا کہ عملے کے باقی ارکان کو اگلے مرحلے میں واپس بھیجا جائے گا۔
اس سے قبل پاکستان کی وزارت خارجہ نے کہا تھا کہ یہ اقدام امریکہ کی جانب سے اعتماد سازی کے اقدام کے طور پر کیا گیا، جس کے تحت ان افراد کو راتوں رات پاکستان منتقل کیا گیا تاکہ بعد میں انہیں ایران واپس بھیجا جا سکے۔
