چھانگ شا (شِنہوا) چین کے وسطی صوبے ہونان میں آتش بازی کا سامان بنانے والے ایک کارخانے میں ہونے والے دھماکے میں ہلاکتوں کی تعداد 37 ہوگئی جبکہ ایک شخص لاپتہ ہے۔
یہ دھماکہ پیر کی شام تقریباً 4 بج کر 43 منٹ پر ہونان کے دارالحکومت چھانگ شا کے زیر انتظام ضلعی شہر لیویانگ میں آتش بازی کا سازوسامان بنانے اور نمائش کرنے والی کمپنی ہواشینگ کے کارخانے میں ہوا۔
جمعہ کو دوپہر 12 بجے تک حادثے میں 37 افراد جان کی بازی ہار چکے تھے، ایک شخص لاپتہ ہے جبکہ 51 زخمی ہسپتالوں میں زیر علاج ہیں۔ زخمیوں میں سے 5 کی حالت تشویشناک ہے تاہم ان کی اہم جسمانی علامات مستحکم بتائی گئی ہیں۔ جائے حادثہ پر تلاش اور امدادی کارروائیاں زیادہ تر مکمل کر لی گئی ہیں۔
حادثے کے بعد چھانگ شا کے حکام نے فوری طور پر ہنگامی اقدامات نافذ کئے، ایک خصوصی ٹاسک فورس قائم کی اور ایک ہزار 500 سے زائد اہلکاروں کو امدادی اور طبی کارروائیوں کے لئے تعینات کیا۔ بعد ازاں تفصیلی تلاش اور جامع معائنے کے بعد 37 ہلاکتوں اور ایک لاپتہ شخص کی تصدیق کی گئی۔
پولیس نے غفلت کے شبے میں 8 افراد کو حراست میں لے لیا ہے۔
