پاکستان تحریک انصاف نے نئے میثاقِ جمہوریت کیلئے تمام جمہوری قوتوں کو دعوت دیتے ہوئے تمام فریقوں کے اتفاق سے الیکشن کمیشن کی تشکیل نو کا مطالبہ بھی کر دیا۔
چیئرمین پی ٹی آئی بیرسٹر گوہر کی زیر صدارت تحریک انصاف کی پارلیمانی پارٹی کا اجلاس ہوا جس میں پی ٹی آئی کے ارکان قومی اسمبلی نے شرکت کی، اجلاس میں متفقہ طور پر قرارداد منظور کی گئی جس میں مطالبہ کیا گیا کہ بے بنیاد اور سیاسی بنیادوں پر قائم مقدمات فوری طور پر ختم کئے جائیں، بانی پی ٹی آئی سے ملاقاتوں کو بحال کیا جائے، حکومت پنجاب کی جانب سے کارکنوں پر لاٹھی چارج اور سندھ حکومت کی جانب سے دورے کے دوران رکاوٹیں ڈالنے کی بھی مذمت کی گئی۔
قرارداد میں موقف اختیار کیا گیا کہ ملک اس وقت نہایت نازک اور پیچیدہ سیاسی دور سے گزر رہا ہے، جمہوری قوتوں سے مطالبہ ہے کہ ایک نئے میثاقِ جمہوریت پر اتفاق کیا جائے، یہ بھی مطالبہ کیا گیا کہ الیکشن کمیشن کی ایسی تشکیل نو شامل ہو جس پر تمام فریقین کا اتفاق ہو جبکہ شفاف، آزاد و منصفانہ نئے انتخابات کا انعقاد یقینی بنایا جائے، سیاسی اسیران کیساتھ انصاف اور قانونی برابری کو یقینی بنایا جائے۔
قرارداد میں مطالبہ کیا گیا کہ خیبر پختونخوا میں پی ٹی آئی کے بلائے گئے امن جرگے کے اعلامیہ کو من وعن تسلیم کیا جائے اوراس پر فوری اور موثر عملدرآمد یقینی بنایا جائے۔
