امیر جماعت اسلامی کراچی منعم ظفر نے کراچی کے مسائل کا ذمہ دار حکومت کو قرار دیتے ہوئے کہا ہے کہ 18ویں ترمیم کے باوجود اختیارات منتقل نہیں ہوئے، ڈویلپمنٹ فنڈز کا ایک پیسہ نہیں ملا۔
نجی ٹی وی سے گفتگو کرتے ہوئے معنم ظفر نے کہا کہ دنیا میں کوئی منصوبہ شروع ہو تو متبادل راستہ بنایا جاتا ہے، مگر کراچی میں کوئی منصوبہ وقت پر نہیں بنتا، شہر میں کہیں پارکنگ دستیاب نہیں، بڑے بڑے پلازے بن جاتے ہیں، پارکنگ نہیں ہوتی۔
انہوں نے کہا کہ سٹی کونسل میں مین ہول میں بچے کے گرنے کے واقعے کے خلاف مشترکہ قرارداد لا رہے تھے، اسے بلڈوز کیا گیا۔
انہوں نے کہا کہ 18ویں ترمیم کے باوجود اختیارات منتقل نہیں کئے گئے، ٹائون کو ملنے والے پیسے تنخواہوں کے ہوتے ہیں، ڈویلپمنٹ کا ایک پیسہ صوبائی حکومت یا کے ایم سی نے نہیں دیا ہے۔
انہوں نے کہا کہ ایس ایس جی سی نے ٹائون کو روڈ کٹنگ کے پیسے دیئے ہیں، 600 گلیوں میں کام شروع کیا ہے، ہم نے اپنے وسائل سے 30 ہزار مین ہول کے کور بنائے اور لگائے ہیں۔
