سیکیورٹی فورسز نے پشاور میں ایف سی ہیڈکوارٹرز پر دہشت گردوں کا حملہ ناکام بنا کر 3دہشت گرد ہلاک کردیئے جبکہ خوارج کی فائرنگ سے 3 جوان شہید ہوگئے۔
سی سی پی او پشاور ڈاکٹر میاں سعید نے بتایا کہ تین خودکش حملہ آوروں نے صبح 8 بج کر 10 منٹ پر فیڈرل کانسٹیبلری پر حملہ کیا، ایک خودکش حملہ آور نے خود کو مرکزی گیٹ پر اڑایا جبکہ دو حملہ آور دھماکے کا فائدہ اٹھاتے ہوئے اندر داخل ہوئے۔
انہوں نے بتایا کہ ہیڈکوارٹرز میں الرٹ اہلکاروں نے فوری کارروائی کرتے ہوئے اندر داخل ہونے والے دونوں حملہ آوروں کو فوری ہلاک کردیا گیا۔
دہشت گردوں کی فائرنگ کے نتیجے میں 3 اہلکار شہید ہوئے جبکہ خود کش حملے کے نتیجے میں دو ایف سی اہلکاروں سمیت 5 افراد زخمی ہوئے جنہیں ایل آر ایچ منتقل کردیا گیا ہے جہاں ان کی حالت خطرے سے باہر ہے۔
سی سی پی او نے بتایا کہ ملک بھر سمیت خیبرپختونخوا بھی امن وامان کے حوالے سے ہائی الرٹ پر ہے۔
انہوں نے بتایا کہ خودکش حملہ آور فیڈرل کانسٹیبلری کی بیرک میں جاکر لوگوں کو یرغمال بنا سکتے تھے، تاہم ایف سی کے الرٹ جوانوں نے فوری ریسپانس کر کے حملہ ناکام بنا دیا۔
انہوں نے بتایا کہ حملہ آوروں کی شناخت کیلئے شواہد اکٹھے کئے جا رہے ہیں۔
