پاکستان اور تاجکستان نے افواج کے درمیان دوطرفہ تعاون مزید بڑھانے کے عزم کا اعادہ کیا ہے۔
آئی ایس پی آر کی جانب سے جاری بیان کے مطابق تاجکستان کے وزیر دفاع کرنل جنرل صابرزادہ امام علی عبداللہ رحیم نے جنرل ہیڈ کوارٹرز راولپنڈی کا دورہ کیا جہاں انہوں نے فیلڈ مارشل سید عاصم منیر سے ملاقات کی جس میں باہمی دلچسپی کے امور، علاقائی سلامتی اور دو طرفہ دفاعی تعاون پر تفصیلی گفتگو ہوئی، دونوں سربراہان نے افواج کے درمیان تعاون مزید بڑھانے کے عزم کا اعادہ کیا۔
آئی ایس پی آر کے مطابق ملاقات میں فوجی تربیت، انسدادِ دہشتگردی و علاقائی امن و استحکام جیسے اہم شعبوں پر بھی اتفاق رائے ہوا۔تاجک وزیر دفاع نے پاک فوج کی پیشہ ورانہ صلاحیتوں اور علاقائی امن کیلئے کردار کو بھرپور سراہتے ہوئے کہا ہے کہ پاکستان کی مسلح افواج نے خطے میں امن کے قیام کیلئے نمایاں کردار ادا کیا ہے۔
ترجمان پاک فوج کے مطابق فیلڈ مارشل سید عاصم منیر نے خطے کی سلامتی اور خوشحالی کیلئے اجتماعی اقدامات کی اہمیت پر زور دیتے ہوئے تاجکستان کے ساتھ دفاع اور سلامتی کے شعبوں میں تعاون مزید بڑھانے کے پاکستان کے عزم کو دہرایا۔
