اسلام آباد: وزیر اعلی خیبر پختونخوا علی امین گنڈا پور نے کہاہے کہ عمران خان کی جان کو اڈیالہ میں خطرہ ہے، مودی جیسے شخص سے کچھ بھی توقع کی جاسکتی ہے رہائی کی درخواست دائر کردی ہے ۔اسلام آباد ہائیکورٹ کے باہر میڈیا سے گفتگو کرتے ہوئے علی امین گنڈاپور نے کہا کہ عدالتوں سے ہمیشہ درخواست کی ہے جو لوگ عدالتوں کا حکم نہیں مانتے ان کیخلاف ایکشن لیں، ملک میں کوئی قانون تو ہے نہیں، ہم نے انصاف کیلئے جو دروازے ہیں وہی کھٹکھٹانے ہیں۔
انہوں نے کہا کہ قومی سلامتی اجلاس میں شرکت بانی پی ٹی آئی سے ملاقات کے بعد ہی ممکن ہے، عمران خان ہمارے اور امت مسلمہ کے لیڈر ہیں ان سے ہدایت لینے کیلئے ہی اڈیالہ میں ملاقات کرنی ہے۔ انہوںنے کہا کہ مودی کے مظالم پر بانی پی ٹی آئی نے ہمیشہ آواز اٹھائی ہے ،مودی کو بھی پتہ ہے عمران خان اڈیالہ جیل میں ہیں، مودی جیسے شخص سے کچھ بھی توقع کی جا سکتی ہے۔
انہوں نے کہا کہ اڈیالہ جیل میں بانی پی ٹی آئی کی جان خطرے میں ہے ان کی پیرول پر رہائی کیلئے درخواست دائر کی ہے۔
