لاہور: نائب امیر جماعت اسلامی پاکستان لیاقت بلوچ نے کہا ہے کہ مزدور دشمن اقدامات پر اتحادی اورحکومت ایک پیج پر ہیں،26ویں آئینی ترمیم کو پارلیمنٹ ہی ختم کرے گی ، ایک سال بعد پی اے سی چیئرمین کا انتخاب مثبت اقدام ہے۔
جاری بیان میں لیاقت بلوچ نے کہا کہ ملی یکجہتی کونسل کا مرکزی وفد 27جنوری کو کرم صورتحال پر وزیراعلی خیبرپختونخوا علی امین گنڈاپور سے اسلام آباد میں ملاقات کرے گا۔انہوں نے کہا کہ مشترکہ مفادات کونسل میں وفاق صوبوں کے اعتراض دور کرے، مزدور دشمن اقدامات پر اتحادی اورحکومت ایک پیج پر ہیں۔
انہوں نے کہا کہ ایک سال بعد پبلک اکاؤنٹس کمیٹی کا چیئرمین منتخب ہونا اچھا اقدام ہے جبکہ سینیٹر اعجاز چوہدری کے پروڈکشن آرڈرز پر عمل نہ کرنے پر چیئرمین سینیٹ کا اجلاس کی صدارت نہ کرنا بھی احسن قدم ہے۔ انہوں نے انسانی سمگلنگ کا قلع قمع کرنے کا مطالبہ کرتے ہوئے کہا کہ 26ویں آئینی ترمیم کو پارلیمنٹ ہی ختم کرے گی اور عدلیہ کی آزادی بحال ہوگی۔
