وزیراعظم شہباز شریف نے کہا ہے کہ غزہ امن منصوبہ مشرق وسطی میں پائیدار امن کی جانب اہم قدم، نسل کش باب کے اختتام کی علامت ہے۔
جاری بیان میں شہباز شریف نے کہا کہ تاریخی غزہ امن منصوبے کی دستخطی تقریب میں مدعو کرنے پر شریک میزبانوں صدر السیسی اور صدر ٹرمپ کا شکر گزار ہوں۔ انہوں نے کہا کہ یہ لمحہ صدر ٹرمپ کی غیر معمولی قیادت اور عزمِ صمیم کے بغیر ممکن نہیں تھا، امن کے حصول کیلئے ٹرمپ کی یکسو جدوجہد نے خونریزی اور تباہی کا خاتمہ ممکن بنایا۔
انہوں نے کہا کہ غزہ امن منصوبہ مشرقِ وسطی میں پائیدار امن کی جانب اہم قدم ہے،آج کی تقریب ایک نسل کش باب کے اختتام کی علامت ہے، ایسا باب جس کے دوبارہ کھلنے سے عالمی برادری کو ہر قیمت پر روکنا ہو گا۔
انہوں نے کہا کہ بہادر اور ثابت قدم فلسطینی عوام ایک آزاد فلسطین کے حقدار ہیں، وہی فلسطین جو 1967 کی سرحدوں کے مطابق ہو اور جس کا دارالحکومت القدس الشریف ہو۔
