لندن (شِنہوا) چین رواں سال لندن میں ہونے والی ’’ورلڈ ٹریول مارکیٹ (ڈبلیو ٹی ایم) 2026‘‘ میں ریکارڈ توڑ انداز میں شرکت کرے گا اور اپنی جدت طرازی کی صلاحیتوں کے ذریعے سیاحوں کی توجہ حاصل کرے گا۔
چین کے قومی سیاحتی دفتر لندن (سی این ٹی او) کے مطابق 3 سے 5 نومبر تک منعقد ہونے والے ایونٹ میں 200 سےزائد مندوبین کے ساتھ چین کے 116 ثقافتی و سیاحتی اداروں اور تنظیموں نے بھی شرکت کی تصدیق کر دی ہے۔
حالیہ برسوں میں ڈبلیو ٹی ایم لندن میں چین کے وفد کی یہ سب سے بڑی شرکت ہوگی۔ اس میں سیاحت کے شعبے کے پورے صنعتی سلسلے کے مختلف شعبوں کی نمائندگی ہوگی، جن میں کانفرنسوں اور نمائشوں کے انتظامات کرنے والی کمپنیاں، سیاحتی ٹیکنالوجی کے ادارے، تفریحی مقامات اور ہوٹل، سیاحتی مقامات اور تھیم پارکس، کھیلوں اور تفریحی سرگرمیوں سے وابستہ کاروبار، کروز جہاز چلانے والی کمپنیاں اور فضائی ادارے شامل ہیں۔
چین کا پویلین تقریباً 490 مربع میٹر رقبے پر محیط ہوگا، جو گزشتہ سال کے مقابلے میں تقریباً 22 فیصد بڑا ہے۔ تقریباً 9 فضائی کمپنیاں، بعض سیاحتی ادارے اور تھیم پارکس اپنے سٹالز پر منفرد ثقافتی اور سیاحتی مصنوعات پیش کریں گے۔
پویلین میں غیر مادی ثقافتی ورثے سے متعلق متعدد انٹرایکٹو سرگرمیاں بھی منعقد کی جائیں گی۔ ان میں روایتی چینی خوشبو تیار کرنے کا فن، بیجنگ اوپیرا کے ماسک پر نقش و نگار بنانا اور سیچھوان میں چائے پیش کرنے کے روایتی فن کا مظاہرہ شامل ہے۔
جدید ٹیکنالوجی کے استعمال کو نمایاں اہمیت دیتے ہوئے پویلین میں مصنوعی ذہانت سے لیس مترجم آلات اور عینکیں، نیز جسمانی حرکت میں مدد دینے والے ذہین ایکسو سکیلیٹن سمیت جدید آلات پیش کئے جائیں گے۔ ان کے ذریعے شرکاء چینی ثقافت کا جامع اور بھرپور تجربہ حاصل کر سکیں گے اور یہ بھی جان سکیں گے کہ چینی ٹیکنالوجی کس طرح سفر کے تجربے کو بہتر بنانے میں کردار ادا کر رہی ہے۔
1980 میں شروع ہونے والی ورلڈ ٹریول مارکیٹ لندن دنیا کی سب سے بڑی اور بااثر سیاحتی نمائشوں میں سے ایک ہے۔ 2025 میں اس میں 182 ممالک اور خطوں کے نمائش کنندگان نے شرکت کی جبکہ 46 ہزار 500 افرادنے اس کا دورہ کیا۔
