لاہور (لارڈ میڈیا): نیشنل ڈیٹا بیس اینڈ رجسٹریشن اتھارٹی (نادرا) نے پنجاب کے آٹھ اضلاع کی خواتین کے لیے جونیئر ایگزیکٹو (ڈیٹا انٹری آپریٹر) کی آسامیوں کا اعلان کر دیا ہے۔ ان آسامیوں کے لیے واک اِن ٹیسٹ 29 ستمبر سے یکم اکتوبر 2026 تک منعقد ہوں گے، جبکہ ٹیسٹ میں کامیاب اور شارٹ لسٹ ہونے والی امیدواروں کے انٹرویوز اگلے مرحلے میں لیے جائیں گے۔
نادرا کے مطابق بھرتی فیصل آباد، چنیوٹ، جھنگ، حافظ آباد، سرگودھا، میانوالی، خوشاب اور بھکر کی خواتین کے لیے ہے۔ درخواست دینے والی خاتون کا متعلقہ ضلع سے تعلق ہونا ضروری ہے، جس کی تصدیق شناختی کارڈ یا ڈومیسائل کے ذریعے کی جائے گی۔
امیدوار کے لیے تعلیمی قابلیت انٹرمیڈیٹ یا اس کے مساوی مقرر کی گئی ہے۔ متعلقہ شعبے میں کم از کم ایک سال کا تجربہ رکھنے والی امیدواروں کو ترجیح دی جائے گی۔ زیادہ سے زیادہ عمر 25 سال مقرر ہے، جس میں پہلے ہی پانچ سال کی رعایت شامل ہے۔ اقلیتی برادریوں اور معذور خواتین بھی درخواست دے سکتی ہیں۔
فیصل آباد، چنیوٹ، جھنگ، حافظ آباد، سرگودھا، میانوالی، خوشاب اور بھکر میں مختلف مقامات پر آسامیاں مختص کی گئی ہیں۔ امیدواروں کو ہدایت کی گئی ہے کہ وہ اپنی مطلوبہ جگہ کی تحصیل کی تفصیل اشتہار میں ضرور چیک کریں۔
شیڈول کے مطابق فیصل آباد، چنیوٹ اور جھنگ کے امیدواروں کے ٹیسٹ 29 ستمبر کو ہوں گے، انٹرویو 30 ستمبر کو ہوگا۔ حافظ آباد اور سرگودھا کے ٹیسٹ 30 ستمبر اور انٹرویو یکم اکتوبر کو ہوگا۔ میانوالی، خوشاب اور بھکر کے ٹیسٹ یکم اکتوبر کو اور انٹرویو 2 اکتوبر کو ہوں گے۔
تمام ٹیسٹ اور انٹرویوز نادرا کے ریجنل ہیڈ آفس، 6 گلشن ایونیو، لنک پی اے ایف روڈ، سرگودھا میں ہوں گے۔ امیدواروں کو اپنے اصل دستاویزات ساتھ لانا ہوں گے۔ سرکاری یا نیم سرکاری اداروں میں کام کرنے والی امیدواروں کے لیے نو آبجیکشن سرٹیفکیٹ بھی لازمی ہوگا۔
منتخب امیدواروں سے میڈیکل فٹنس اور کردار کے سرٹیفکیٹ بھی طلب کیے جائیں گے۔ غلط معلومات فراہم کرنے والی امیدوار کو نااہل قرار دیا جا سکتا ہے۔ مزید معلومات نادرا کے کیریئرز پورٹل پر دستیاب ہیں۔
