تہران (شِنہوا) ایران کی اسلامی انقلابی گارڈ کور (آئی آر جی سی) کی بحریہ نے کہا ہے کہ آبنائے ہرمز کے جنوب میں بحری سرنگ سے ٹکرانے کے بعد ’’خلاف ورزی کرنے والے‘‘ ایک بڑے تیل بردار جہاز میں دھماکہ ہوا اور وہ آگ کی لپیٹ میں آ گیا۔ یہ اس آبی گزرگاہ میں بحری سرنگوں سے ٹکرانے کے بعد جلنے والا تیسرا تیل بردار جہاز ہے۔
آئی آر جی سی کے سرکاری خبر رساں ادارے ’’سپاہ نیوز‘‘ پر جاری کردہ بیان میں بحریہ نے کہا کہ 20 لاکھ بیرل سے زیادہ خام تیل لے جانے والے اس جہاز نے اپنے ریڈار اور نیویگیشن نظام بند کر رکھے تھے۔ جہاز نے آبی گزرگاہ کے جنوب میں ایک ’’غیر مجاز‘‘ راستے سے باہر نکلنے کی کوشش کرتے ہوئے بحریہ کی تنبیہات کو نظر انداز کیا۔
آئی آر جی سی کی بحریہ نے خبردار کیا کہ ’’غیر مجاز‘‘ راستے استعمال کرنے والے جہاز اپنے اقدامات کے خود ذمہ دار ہوں گے اور آبی گزرگاہ کی سلامتی کو نظر انداز کرنے والی کسی بھی کارروائی کا ’’فیصلہ کن‘‘ جواب دیا جائے گا۔
