کنساس (لارڈ میڈیا): امریکی ریاست کنساس میں 24 سالہ جیڈن جے ریڈ کو صدر ڈونلڈ ٹرمپ کو قتل کی مبینہ دھمکیاں دینے کے الزام میں گرفتار کیا گیا ہے۔ حکام کے مطابق، جیڈن نے سوشل میڈیا پر ٹرمپ کو گولی مارنے کی بات کی اور ٹرمپ کی تقریر کی جگہ کے آس پاس کی عمارتوں کی چھتوں کا نقشہ بھی تیار کرنے کا دعویٰ کیا۔ جیڈن کی گرفتاری ٹرمپ کے 19 اکتوبر کے وکیٹا دورے سے قبل عمل میں آئی۔
حکام کو اس واقعے کی اطلاع 15 اکتوبر کو کرائم اسٹاپرز کے ذریعے ملی، جس کے بعد امریکی سیکرٹ سروس، ایف بی آئی، کنساس بیورو آف انویسٹی گیشن، ہائی وے پٹرول اور وکیٹا پولیس نے تحقیقات شروع کیں۔ جیڈن کو کلیئر واٹر سے گرفتار کر کے وفاقی تحویل میں دے دیا گیا۔
کنساس کے وفاقی پراسیکیوٹر ریان کریگ ہاؤزر نے کہا ہے کہ سیاسی تشدد اور اس کی دھمکیوں کو برداشت نہیں کیا جائے گا۔ آئین سیاسی اختلاف کی اجازت دیتا ہے لیکن یہ قانونی حدود کے اندر ہونا چاہیے۔
جیڈن کو حراست میں رکھنے کا فیصلہ ڈیٹینشن ہیئرنگ تک برقرار رہے گا۔ وفاقی قانون کے تحت صدر کو جان سے مارنے یا جسمانی نقصان پہنچانے کی دھمکی پر زیادہ سے زیادہ پانچ سال قید کی سزا ہو سکتی ہے۔
