اسلام آباد (لارڈ میڈیا): وزیراعظم محمد شہباز شریف نے چھاتی کے سرطان (بریسٹ کینسر) سے متعلق آگاہی بڑھانے، مرض کی جلد تشخیص اور بروقت علاج کی ضرورت پر زور دیتے ہوئے کہا ہے کہ حکومت پاکستان بھر میں خواتین کو معیاری طبی سہولیات کی فراہمی یقینی بنانے کے لیے پرعزم ہے۔
بریسٹ کینسر آگاہی کے دن اپنے پیغام میں وزیراعظم نے کہا کہ پاکستان بھی خواتین کو درپیش صحت کے مسائل، بالخصوص چھاتی کے سرطان سے نمٹنے کے لیے عالمی برادری کے ساتھ مل کر آگاہی پیدا کرنے کی کوششوں میں شریک ہے۔
وزیراعظم شہباز شریف نے کہا کہ حکومت نے ایک جامع حکمتِ عملی تیار کی ہے، جس کا محور مرض کی جلد تشخیص، بروقت طبی معائنے، معیاری علاج تک رسائی اور ملک بھر میں علاج کے تسلسل کو یقینی بنانا ہے۔
انہوں نے کہا کہ وفاقی حکومت صوبائی حکومتوں اور متعلقہ اداروں کے ساتھ مل کر خصوصی سرطان مراکز سمیت ضروری طبی سہولیات کی دستیابی یقینی بنانے کے لیے کام کر رہی ہے۔
وزیراعظم نے زور دیا کہ دیہی اور پسماندہ علاقوں میں رہنے والی خواتین پر خصوصی توجہ دینے کی ضرورت ہے، کیونکہ انہیں طبی سہولیات تک رسائی میں مشکلات کا سامنا کرنا پڑتا ہے۔
انہوں نے کہا کہ حکومت اس عزم پر قائم ہے کہ کسی بھی پاکستانی خاتون کو جغرافیائی یا مالی مشکلات کی وجہ سے بروقت اور معیاری علاج سے محروم نہ رہنا پڑے۔
لیڈی ہیلتھ ورکرز کا اہم کردار
وزیراعظم نے دور دراز علاقوں میں خدمات انجام دینے والی لیڈی ہیلتھ ورکرز کی خدمات کو سراہتے ہوئے کہا کہ خواتین تک صحت کی سہولیات پہنچانے میں ان کا کردار انتہائی اہم ہے۔
انہوں نے بتایا کہ حکومت کے بریسٹ کینسر آگاہی پروگرام کے تحت لیڈی ہیلتھ ورکرز کو تربیت دی جا رہی ہے تاکہ وہ خواتین کو چھاتی کے خود معائنے، مرض کی علامات پہچاننے، بروقت طبی مشورہ لینے اور مناسب علاج کی سہولیات تک رسائی کے بارے میں آگاہ کرسکیں۔
وزیراعظم کے مطابق شہری اور دیہی علاقوں کے بنیادی مراکزِ صحت میں کام کرنے والے طبی عملے کو بھی خصوصی تربیت فراہم کی جا رہی ہے تاکہ چھاتی کے سرطان کی ابتدائی تشخیص کی صلاحیت بہتر بنائی جاسکے۔
پمز میں مفت اسکریننگ اور علاج کی سہولیات
وزیراعظم شہباز شریف نے کہا کہ پاکستان انسٹی ٹیوٹ آف میڈیکل سائنسز (پمز) میں قائم وفاقی بریسٹ کینسر اسکریننگ سینٹر مفت اسکریننگ، تشخیصی خدمات اور ادویات فراہم کر رہا ہے، جبکہ مشتبہ کیسز کو مزید معائنے اور علاج کے لیے متعلقہ شعبوں میں بھیجا جا رہا ہے۔
انہوں نے کہا کہ حکومت سرکاری صحت اور سماجی تحفظ کے پروگراموں کے ذریعے نجی اداروں کے تعاون سے بریسٹ کینسر کی اسکریننگ تک رسائی بڑھانے اور طبی اداروں و دیگر متعلقہ فریقین کے درمیان رابطہ بہتر بنانے کے لیے بھی کام کر رہی ہے۔
وزیراعظم نے کہا کہ چھاتی کا سرطان مریضوں اور ان کے اہل خانہ پر گہرے سماجی اور نفسیاتی اثرات مرتب کرسکتا ہے، اس لیے متاثرہ خواتین کے لیے ہمدردانہ اور معاون ماحول فراہم کرنا ضروری ہے۔
انہوں نے کہا، ’’پاکستان کی ہر بیٹی کے لیے میرا پیغام ہے کہ آپ کی صحت پوری قوم کی ترجیح ہے۔‘‘ وزیراعظم نے خواتین پر زور دیا کہ صحت سے متعلق کسی بھی تشویش کی صورت میں بلا تاخیر طبی مشورہ حاصل کریں۔
وزیراعظم نے خاندانوں، مقامی برادریوں، میڈیا اداروں، علمائے کرام، تعلیمی اداروں، سول سوسائٹی اور طبی ماہرین سے بھی اپیل کی کہ وہ بریسٹ کینسر سے جڑی خاموشی اور سماجی بدنامی کے تصور کو ختم کرنے میں اپنا کردار ادا کریں۔
انہوں نے کہا کہ زیادہ سے زیادہ آگاہی خواتین کو بیماری کے بارے میں معلومات اور طبی مدد حاصل کرنے کا اعتماد فراہم کرے گی، تاکہ وہ خوف یا ہچکچاہٹ کے بغیر علاج کے لیے آگے آسکیں۔
وزیراعظم شہباز شریف نے اس عزم کا اعادہ کیا کہ حکومت خواتین کی صحت کے تحفظ اور بروقت، قابلِ استطاعت اور معیاری طبی سہولیات تک رسائی بہتر بنانے کے لیے اقدامات جاری رکھے گی۔
