ڈربن، جنوبی افریقہ (شِنہوا) جنوبی افریقہ کے صوبے کوا زولو-نٹل میں چار دہائیوں سے زائد عرصے سے فعال ایک سیمنٹ پلانٹ ایک نیا روپ دھار رہا ہے۔
دسمبر 2023 میں ہواشین بلڈنگ میٹریلز گروپ کمپنی لمیٹڈ کے زیر انتظام لئے گئے سیموما سیمنٹ پلانٹ میں پرانے آلات کو اپ گریڈ کیا جا رہا ہے، ضائع ہونے والی حرارت کو بجلی میں تبدیل کیا جا رہا اور ڈیزل سے چلنے والے مائننگ ٹرکوں کی جگہ الیکٹرک ٹرک شامل کئے جا رہے جبکہ اس کے ساتھ ساتھ مقامی ملازمین چینی ساتھیوں کے ساتھ تربیت اور عملی تبادلوں کے ذریعے تکنیکی مہارتیں حاصل کر رہے ہیں۔
سیموما اس سے قبل نٹل پورٹ لینڈ سیمنٹ (این پی سی) کا ایک اہم پیداواری مرکز تھا جو جنوبی افریقہ کے بڑے سیمنٹ پروڈیوسرز میں سے ایک ہے۔ اگرچہ پلانٹ کا ایک پیداواری نظام اور تقسیم کا نیٹ ورک موجود تھا لیکن کچھ آلات دہائیوں سے کام کر رہے تھے جس سے پیداواری لاگت میں اضافہ ہونے کے علاوہ کارکردگی و صلاحیت محدود ہو رہی تھی۔
این پی سی کا کنٹرول سنبھالنے کے بعد ہواشین نے سیموما کو تکنیکی اپ گریڈیشن اور صلاحیت میں توسیع کے لئے ایک اہم مقام بنایا۔
سیموما پلانٹ کے منیجر روری گووینڈر نے کہا کہ یہاں 1984 میں سرگرمیوں کا آغاز ہوا تھا جو کافی پرانی بات ہے۔ اس لئے اسے اپ گریڈ کرنے، جدید اور فعال بنانے کی اشد ضرورت تھی۔ جب ہواشین نے پلانٹ کا انتظام سنبھالا اور توسیع و اپ گریڈیشن کا آغاز کیا تو ہم بہت پرجوش تھے کیونکہ ہم طویل عرصے سے یہ چاہتے تھے۔
پلانٹ کے تمام آلات کو مکمل طور پر تبدیل کرنے کے بجائے ہواشین نے پیداواری عمل کی بنیادی رکاوٹیں دور کرتے ہوئے اور موجودہ بنیادی ڈھانچہ ہی استعمال کرتے ہوئے مخصوص اہداف کی اپ گریڈیشن پر توجہ مرکوز کی ہے۔
پلانٹ کے مینٹیننس منیجر وانگ ڈونگ ڈونگ نے کہا کہ ہم صرف چین سے کوئی حل اٹھا کر یہاں نافذ نہیں کر رہے بلکہ موجودہ آلات اور جنوبی افریقہ کی عملی صورتحال کا جائزہ لے رہے ہیں اور اہداف پر مبنی اپ گریڈیشن کر رہے ہیں۔
وانگ نے مزید بتایا کہ پری ہیٹر ٹاور اور کلنکر کولر سمیت اہم سہولیات کو اپ گریڈ کیا گیا جبکہ چونا پتھر کی کان اور پیداواری لائن کے دیگر حصوں میں بھی اصلاحات کی گئی ہیں۔
گووینڈر کے مطابق کلن نمبر 2 سے کلنکر کی روزانہ پیداوار تقریباً 1500 ٹن سے بڑھ کر 4 ہزار ٹن ہو گئی ہے جبکہ چار دہائیوں سے زیادہ عرصے سے فعال کلن نمبر ایک کی پیداوار روزانہ تقریباً 1500 ٹن سے بڑھ کر 2200 ٹن ہو گئی ہے۔
گووینڈر نے کہا کہ پلانٹ کے پاس اب سالانہ کلنکر کی پیداواری صلاحیت تقریباً 18 لاکھ ٹن اور سیمنٹ کی پیداواری صلاحیت تقریباً 25 لاکھ ٹن ہے۔ انہوں نے مزید کہا کہ اس سے پلانٹ کو نہ صرف کوا زولو-نٹل میں بلکہ پورے جنوبی افریقہ میں سیمنٹ کی مارکیٹ میں فراہم کرنے کی کہیں زیادہ مضبوط صلاحیت ملتی ہے۔
