برسلز (لارڈ میڈیا): نیٹو نے ایران کی جانب سے رکن ممالک کو لاحق خطرات کے جواب میں مکمل تیاری کا عندیہ دیا ہے۔ یہ بیان ایران کی جانب سے واشنگٹن کے خلاف مزید کارروائی کی صورت میں یورپ میں امریکی اڈوں کو نشانہ بنانے کے امکان کے بعد دیا گیا ہے۔
نیٹو کے ایک عہدیدار نے بتایا کہ رواں سال کے آغاز میں نیٹو کے فضائی دفاعی نظام نے ایران کے ترکیہ کی جانب داغے گئے میزائلوں کو راستے میں ہی تباہ کر کے اپنی اہلیت ثابت کی۔ نیٹو نے مختلف مواقع پر میزائلوں کو کامیابی سے روکا، جس سے ان کی دفاعی صلاحیت اور پوزیشن کی مضبوطی ظاہر ہوتی ہے۔
نیٹو عہدیدار کا کہنا تھا کہ رکن ممالک کے دفاع کے لیے نیٹو کسی بھی خطرے سے نمٹنے کے لیے مکمل تیار ہے۔ یہ بیان فنانشل ٹائمز کی رپورٹ کے بعد سامنے آیا جس میں ایران کے ردعمل میں یورپ میں موجود امریکی اڈوں کو نشانہ بنانے کا ذکر تھا۔
ایران امریکہ کے ساتھ جنگ کے آغاز کے بعد سے متعدد خلیجی ممالک پر میزائل اور ڈرون حملے کر چکا ہے۔ اب ایسی رپورٹس بھی سامنے آئی ہیں کہ وہ یورپی ممالک میں امریکی فوجی اڈوں کو نشانہ بنانے کی کوشش کر سکتا ہے۔
