شہر (لارڈ میڈیا): سائنس دانوں نے خلا میں قدرتی شکر کی موجودگی کا انکشاف کیا ہے، جسے کائنات میں زندگی کی تلاش اور زمین پر زندگی کی ابتدا کو سمجھنے کے لیے اہم پیش رفت قرار دیا جا رہا ہے۔ محققین نے ‘ایریتھرولوز’ نامی قدرتی شکر ہماری کہکشاں ملکی وے کے مرکزی حصے کی سمت میں دریافت کی ہے۔
ماہرین کے مطابق یہ شکر زمین پر راسبیری جیسے پھلوں میں قدرتی طور پر پائی جاتی ہے اور بعض مصنوعی ٹیننگ مصنوعات میں بھی استعمال ہوتی ہے۔ سائنس دانوں کا کہنا ہے کہ شکر زندگی کے بنیادی اجزا میں شامل ہے کیونکہ یہ ڈی این اے اور آر این اے کی ساخت کا حصہ بنتی ہے اور خلیات کے کئی حیاتیاتی عمل کے لیے توانائی فراہم کرتی ہے۔
ماہرین نے کہا ہے کہ زندگی کے آغاز میں بھی شکر نے اہم کردار ادا کیا ہوگا۔ تاہم، اب تک یہ واضح نہیں ہو سکا کہ ایسی شکر زمین یا خلا میں کیسے وجود میں آئی، کیونکہ تجربہ گاہوں میں کیے گئے تجربات سے معلوم ہوا ہے کہ زندگی کے آغاز سے پہلے موجود حالات میں اس قسم کی شکر کا بننا آسان نہیں تھا۔
ماہرین کا کہنا ہے کہ خلا میں قدرتی شکر کی یہ دریافت سوال کا جواب تلاش کرنے میں مدد دے سکتی ہے کہ زمین پر زندگی کیسے شروع ہوئی اور کیا کائنات کے دیگر حصوں میں بھی زندگی کے لیے ضروری بنیادی اجزا موجود ہو سکتے ہیں۔
