کویت (لارڈ میڈیا) کویت کے جنرل اسٹاف ہیڈکوارٹرز کے تحت فوج میں رضاکارانہ بھرتیوں کا آغاز کر دیا گیا ہے۔ یہ بھرتی نان کمیشنڈ افسران اور جوانوں کے تربیتی کورس کے لیے کی جا رہی ہے، جہاں مختلف تعلیمی پس منظر رکھنے والے اہل کویتی شہری درخواست دے سکتے ہیں۔
وزارتِ دفاع کے مطابق آن لائن رجسٹریشن 28 جولائی 2026 سے شروع ہو چکی ہے اور درخواستیں جمع کرانے کی آخری تاریخ 18 اگست 2026 مقرر کی گئی ہے۔
اہل امیدواروں میں یونیورسٹی ڈگری، ہائی اسکول کے بعد ڈپلومہ، انٹرمیڈیٹ یا اس کے مساوی تعلیم رکھنے والے افراد شامل ہیں۔ وزارت نے ہر تعلیمی زمرے کے لیے مقررہ شرائط کا اعلان کیا ہے۔
وزارتِ دفاع کے مطابق درخواست گزار کا کویتی شہری ہونا لازمی ہے اور عمر 18 سے 26 سال کے درمیان ہونی چاہیے۔ مزید برآں، امیدوار کا طبی معائنے میں فٹ قرار پانا ضروری ہے اور قد کم از کم 157 سینٹی میٹر ہونا چاہیے۔
وزارت نے بتایا کہ تعلیمی قابلیت کے مطابق امیدواروں کو مختلف فوجی رینکس دیے جائیں گے، جیسے پی ایچ ڈی والے کو وارنٹ آفیسر کا رینک ملے گا۔
نان کمیشنڈ افسران کے تربیتی کورس کی مدت چار ماہ ہوگی جبکہ عام فوجیوں کی بنیادی تربیت تین ماہ ہوگی۔
درخواست کے لیے مطلوبہ دستاویزات میں اصل کویتی شہریت کا سرٹیفکیٹ، شناختی کارڈ، پیدائش سرٹیفکیٹ اور تعلیمی سند شامل ہیں۔
