اسلام آباد (لارڈ میڈیا): قومی احتساب بیورو (نیب) بڑی تعداد میں بدعنوانی کے کیسز کو بند ہونے سے بچانے کے لئے قانون کی نئی تشریح پر غور کر رہا ہے۔ یہ اقدام مہنگائی کے تناسب سے نیب کے مالیاتی دائرہ کار میں ردوبدل کے تحت کیا جا رہا ہے۔
نیب کی جانب سے زیر غور تجویز کے مطابق، مالیاتی حد جو کہ 500 ملین روپے سے بڑھ کر 800 ملین روپے ہوگئی ہے، اس کا اطلاق متاثرہ فریق کو ہونے والے مالی نقصان پر بھی ہوگا۔ ایگزیکٹو بورڈ میٹنگ میں اس تجویز کو پیش کیے جانے کا امکان ہے۔
نیب ذرائع کا کہنا ہے کہ اس تجویز کے تحت، مبینہ مالی نقصان کی موجودہ قدر کو مہنگائی کے فارمولے کے مطابق دوبارہ متعین کیا جائے گا تاکہ کیسز نیب کے دائرہ کار میں واپس آسکیں۔
ماہرینِ قانون کے مطابق اگر اس تجویز کو چیلنج کیا گیا تو عدالتی جائزہ لیا جا سکتا ہے۔ نیب کی اعلیٰ قیادت ابھی اس تجویز پر غور کر رہی ہے۔
