کنشاسا (لارڈ میڈیا): جمہوریہ کانگو (ڈی آر سی) میں ایبولا وائرس کے پھیلاؤ میں مسلسل اضافہ ہو رہا ہے، جہاں متاثرہ افراد کی تعداد 782 تک پہنچ گئی ہے جبکہ 181 افراد ہلاک ہو چکے ہیں۔
کانگو کی وزارت صحت کے مطابق ایبولا کی وبا ملک کے مختلف متاثرہ صوبوں میں پھیلی ہوئی ہے، جہاں طبی ٹیمیں متاثرہ افراد کا سراغ لگانے، ویکسینیشن مہم چلانے اور مریضوں کو آئسولیشن مراکز میں علاج فراہم کر رہی ہیں۔
حکام نے بتایا ہے کہ وبا کا زیادہ تر پھیلاؤ مشرقی علاقوں ایتوری، نارتھ کیوو اور ساؤتھ کیوو میں دیکھا جا رہا ہے۔ گزشتہ 24 گھنٹوں میں 72 نئے کیسز سامنے آئے، جن میں سے تمام کیسز صوبہ ایتوری میں رپورٹ ہوئے ہیں۔
ایبولا ایک متعدی اور جان لیوا وائرس ہے جو متاثرہ شخص کے جسمانی رطوبتوں کے ذریعے منتقل ہوتا ہے۔ کانگو گزشتہ کئی برسوں سے ایبولا کے مختلف پھیلاؤ کا سامنا کرتا رہا ہے، جس کی وجہ گھنے جنگلات اور سرحدی نقل و حرکت کو قرار دیا جاتا ہے۔
وبا پر قابو پانے کے لیے حکومت اور بین الاقوامی ادارے ویکسینیشن، نگرانی، رابطہ ٹریسنگ اور فوری ردعمل کی حکمت عملی پر عمل کر رہے ہیں۔ سیکیورٹی خدشات اور دشوار گزار جغرافیائی حالات امدادی سرگرمیوں میں رکاوٹ بن رہے ہیں۔
عالمی ادارۂ صحت نے خبردار کیا ہے کہ وبا کے پھیلاؤ کو روکنے کے لیے جلد تشخیص اور فوری آئسولیشن انتہائی ضروری ہے۔ کانگو کی وزارت صحت نے کہا ہے کہ فیلڈ تحقیقات اور ویکسینیشن مہم جاری ہیں اور آئندہ دنوں میں مزید تفصیلات جاری کی جائیں گی۔
