اقوام متحدہ (شِنہوا) نیویارک میں اقوام متحدہ کے ہیڈ کوارٹرز میں منعقدہ ایک اجلاس کے دوران گروپ آف فرینڈز آف گلوبل گورننس نے اقوام متحدہ کے اختیار کو برقرار رکھنے اور بین الاقوامی قانون کی بالادستی کے تحفظ پر زور دیا ہے۔
اجلاس کے بعد جاری ہونے والے ایک مشترکہ اعلامیہ میں گروپ کے اراکین نے کہا کہ دنیا ہنگامہ خیز اور تبدیلی کے دور میں داخل ہو چکی ہےجس میں اقوام متحدہ اور کثیر الجہتی نظام کو بڑھتے ہوئے دباؤ کا سامنا ہے اور عالمی نظم ونسق کا فقدان مسلسل وسیع ہوتا جا رہا ہے۔
گروپ میں شامل تمام فریقین نے چین کی جانب سے پیش کردہ گلوبل گورننس انیشی ایٹو کا خیرمقدم کیا اور اس بات پر زور دیا کہ یہ اقدام اقوام متحدہ کے چارٹر کے مقاصد اور اصولوں کے عین مطابق ہے اور اس کا مقصد بین الاقوامی امور میں اقوام متحدہ کے مرکزی کردار کو مضبوط کرتے ہوئے کثیر الجہتی کا دفاع اور اس پر عمل کرنا ہے۔
گروپ کے اراکین نے عالمی نظم و نسق کے نظام میں اصلاحات اور بہتری کے حوالے سے وسیع اتفاق رائے حاصل کیا اور بین الاقوامی برادری پر زور دیا کہ وہ عالمی چیلنجوں سے مل کر نمٹنے کے لئے اقدامات کرے۔
تمام اراکین نے اقوام متحدہ پر زور دیا کہ وہ بین الاقوامی صورتحال میں ہونے والی تبدیلیوں کے مطابق خود کو بہتر طور پر ڈھالے، گلوبل ساؤتھ کی آواز اور نمائندگی کو بڑھائے اور ترقی پذیر ممالک کی جائز امنگوں کی بہتر عکاسی کرے۔
گروپ کے اراکین نے عالمی نظم و نسق سے متعلق امور پر مکالمے اور رابطے کو مزید مضبوط بنانے پر اتفاق کیا، اجلاس کی میزبانی کے لئے چین کی کوششوں کو سراہا اور زیادہ منصفانہ اور مساوی عالمی نظم و نسق کے نظام کی تعمیر کے لیے اتحاد اور تعاون بڑھانے کے عزم کا اظہار کیا۔
چینی وزیر خارجہ اور کمیونسٹ پارٹی آف چائنہ کی مرکزی کمیٹی کے سیاسی بیورو کے رکن وانگ یی نے اجلاس میں شرکت کی اور خطاب کیا۔ اجلاس میں پاکستان، ترکمانستان، کیوبا، کرغزستان، زمبابوے، قازقستان اور کمبوڈیا سمیت 60 سے زائد ممالک کے نمائندوں نے شرکت کی۔
