شنگھائی (شِنہوا) چین میں مقامی طور پر تیار کردہ دوسرے بڑے کروز جہاز نے 12 روزہ آزمائشی سمندری سفر کا آغاز کر دیا جو اس جہاز کی باضابطہ حوالگی سے پہلے آخری اہم مرحلہ ہے۔ یہ اقدام ایسے وقت میں سامنے آیا ہے جب چین کروز سیاحت کی عالمی منڈی میں اپنی موجودگی مزید مضبوط بنا رہا ہے۔
چائنہ سٹیٹ شپ بلڈنگ کارپوریشن (سی ایس ایس سی) کی ذیلی جہاز ساز کمپنی شنگھائی وائی گاؤچھیاؤ شپ بلڈنگ کمپنی لمیٹڈ نے پہلے آزمائشی سفر کے لئے 12 ممالک سے تعلق رکھنے والے 937 ماہرین کو جہاز پر مدعو کیا۔
اس سفر کے دوران ماہرین 149 مختلف ٹیسٹ اور تصدیق کے مراحل مکمل کریں گے تاکہ “اڈورا فلورا سٹی” نامی جہاز کی اہم کارکردگی کا جائزہ لیا جا سکے۔ اس جہاز کو 20 مارچ کو شنگھائی میں گودی سے باہر نکالا گیا تھا۔
341 میٹر لمبے اور ایک لاکھ 41 ہزار 900 گراس ٹن حجم کے حامل اس کروز جہاز میں 2 ہزار 130 کیبین اور سوٹس موجود ہیں جبکہ یہ 5 ہزار 232 مسافروں کو لے جانے کی صلاحیت رکھتا ہے۔ یہ جہاز “اڈورا میجک سٹی” کا سسٹر شپ ہے۔ کمپنی کے مطابق “اڈورا فلورا سٹی” میں اندرونی ڈیزائن، سمارٹ ٹیکنالوجی اور مجموعی سفری تجربے کے لحاظ سے نمایاں بہتری کی گئی ہے۔
نئے جہاز کی حوالگی 6 نومبر کو متوقع ہے جس کے بعد یہ چین کے جنوبی شہر گوانگ ژو میں واقع نان شا انٹرنیشنل کروز ہوم پورٹ سے بین الاقوامی روٹس پر سفر شروع کرے گا۔
