بینکاک (شِنہوا) چینی کار ساز کمپنی چیری اور اس کی ذیلی کمپنی اوموڈا اینڈ جائیکو نے تھائی لینڈ میں نئی توانائی والی گاڑیوں (این ای وی) کی پیداوار کے پلانٹ کا باضابطہ افتتاح کر دیا جو ان کے عالمی پیداواری دائرہ کار کو بڑھانے میں ایک اہم سنگ میل ہے۔
یہ پلانٹ تھائی لینڈ کے مشرقی صوبے رایونگ میں واقع ہے جو جدید پیداواری صلاحیتوں سے لیس ہے جن میں ایلومینیم باڈی ویلڈنگ اور مکمل بیٹری پروڈکشن لائنز شامل ہیں۔ اس کا ہدف 2030 تک سالانہ 80 ہزار گاڑیاں بناناہے۔
افتتاحی تقریب میں چیری انٹرنیشنل کے ایگزیکٹو نائب صدر چھن چھون چھنگ نے کہا کہ نئے کارخانے نے کمپنی کی مقامی سطح پر کام کرنے کی کوششوں کو نمایاں کیا ہے اور تھائی لینڈ کو خطے میں نئی توانائی گاڑیوں (این ای وی) کا مرکز بنایا ہے۔
انہوں نے کہا کہ چیری تھائی مارکیٹ میں اپنی جدید ترین گاڑیاں متعارف کرانا جاری رکھے گی اور ساتھ ہی جدید ٹیکنالوجیز جیسے گاڑیوں کو خودکار طور پر چلانے کا نظام، گاڑی پارک کرنے کا خودکار نظام اور مصنوعی ذہانت (اے آئی ) پر مبنی انٹرایکٹو ٹیکنالوجیز کو بھی تیزی سے متعارف کرائے گی۔
تھائی وزیراعظم کے دفتر سے وابستہ وزیر سپامس اسارا بھکدی نے اس بات پر زور دیا کہ یہ سرمایہ کاری حکومت کے اس ہدف سے ہم آہنگ ہے کہ 2030 تک ملک کی گاڑیوں کی مجموعی پیداوار میں 30 فیصد حصہ صفر اخراج والی گاڑیوں کا ہو۔
طویل المدتی صنعتی ترقی کو یقینی بنانے کے لئے اوموڈا اینڈ جیکو تھائی لینڈ نے افتتاحی تقریب کے دوران صوبہ چھونبوری اور رایونگ کے ٹیکنیکل کالجوں کے ساتھ ایک مفاہمتی یادداشت پر دستخط بھی کئے۔
