اقوام متحدہ (شِنہوا) اقوام متحدہ میں ایران کے مستقل مندوب امیر سعید ایراوانی نے کہا ہے کہ سلامتی کونسل ایران پر امریکہ اور اسرائیل کے حملوں کے متعلق مضبوط، واضح اور غیر مبہم اقدام کرے۔
میڈیا کو جاری کئے گئے ایک بیان میں ایراوانی نے کہا کہ امریکہ نے اسرائیل کی مکمل ہم آہنگی کے ساتھ ایران کے خلاف دوسرا دانستہ اور بلا جواز فوجی حملہ کیا ہے جو جارحیت کا ایک منظم اقدام ہے۔
انہوں نے کہا کہ بڑے شہروں اور گنجان آباد شہری علاقوں کو نشانہ بنایا گیا۔ سینکڑوں بے گناہ شہری مارے گئے ہیں اور بہت سے زخمی ہوئے ہیں۔
انہوں نے کہا کہ یہ اقوام متحدہ کے چارٹر کی کھلم کھلا خلاف ورزی ہے، جو کسی بھی ریاست کی خودمختاری اور علاقائی سالمیت کے خلاف طاقت کااستعمال کرنے یا اس کی دھمکی دینے کی سختی سے ممانعت کرتا ہے۔
انہوں نے کہا کہ یہ بین الاقوامی قانون کی بنیادوں پر براہ راست حملہ ہے۔ حقائق واضح ہیں۔ جارحیت واضح ہے۔ ذمہ داری بھی واضح ہے۔
امیر سعید ایراوانی نے کہا کہ امریکہ اور اسرائیل نے جان بوجھ کر ایران کے سپریم لیڈر آیت اللہ علی خامنہ ای اور دیگر اعلیٰ فوجی حکام کو نشانہ بنایا، اقوام متحدہ کے کسی بھی خودمختار رکن ملک کے سب سے اعلیٰ عہدیدار کو نشانہ بنانا بین الاقوامی قانون کی سنگین خلاف ورزی اور خود مختار مساوی حیثیت پر براہ راست حملہ ہے۔
