نیو یارک: امریکہ میں سکھوں کی عالمی تنظیم سکھ فار جسٹس نے جعفر ایکسپریس حملے میں ‘را’ کو ملوث قرار دیتے ہوئے کہاہے کہ مودی کا بھارت علاقائی خطرہ نہیں، مکمل دہشت گرد حکومت ہے،سفارتی و سیکیورٹی پابندیاں عائد کی جائیں، دنیا بھارت کی خفیہ دہشت گردانہ کارروائیوں پر آنکھیں بند نہیں کر سکتی،ابھی احتساب نہ کیا تو اگلا حملہ اور بھی زیادہ معصوم جانیں لے گا۔ رہنماء سکھ فار جسٹس گرپتونت سنگھ پنوں نے جاری بیان میں کہا ہے کہ بلوچستان میں ٹرین دہشت گرد حملے میں را ملوث ہے، عالمی ادارے بھارتی قومی سلامتی کے مشیر اجیت دوول اور را کیخلاف کارروائی کریں۔
انہوں نے کہا کہ پاکستان کیخلاف بھارت خفیہ جنگی حکمت عملی کے بلیو پرنٹ پر عمل کر رہا ہے، مودی کا بھارت صرف علاقائی خطرہ نہیں، یہ ایک مکمل دہشت گرد حکومت ہے، مودی حکومت پرتشدد ،عالمی جبر میں مصروف ہے۔
انہوں نے کہا کہ بلوچستان ٹرین حملہ بھارت کے جارحانہ دفاعی نظریئے کا ثبوت ہے، بھارت خفیہ دہشت گردانہ کارروائیوں سے پڑوسی ممالک کو غیر مستحکم کرنا چاہتا ہے، بھارت بیرونِ ملک مخالفین کے قتل، انتہا پسندی اور سرحد پار دہشت گردی میں ملوث ہے۔
انہوں نے کہا کہ مودی نے بھارت کو ریاستی سرپرستی میں دہشت گردی کا عالمی مرکز بنا دیا ہے، را کی بے قابو کارروائیاں جنوبی ایشیا کو خطرے میں ڈال رہی ہیں اور ریاستی تشدد کی خطرناک عالمی مثال قائم کر رہی ہیں۔
انہوں نے کہا کہ بھارت کے انٹیلی جنس آپریٹس پر سفارتی اور سکیورٹی پابندیاں لگائی جائیں، دنیا اب بھارت کی خفیہ دہشت گردانہ کارروائیوں پر آنکھیں بند نہیں کر سکتی۔ انہوں نے کہا کہ بھارت کا احتساب نہ کیا گیا توان کا اگلا حملہ اور بھی زیادہ معصوم جانیں لے گا۔
