بیجنگ (شِنہوا) بیجنگ کے صاف آسمان شہر میں فضائی آلودگی سے نمٹنے میں ہونے والی پیش رفت کی نمایاں علامت بن چکے ہیں اور اس پیش رفت کے پس پردہ ڈیجیٹل ٹیکنالوجیز تیزی سے اہم کردار ادا کر رہی ہیں۔
2025 میں بیجنگ میں 311 دن ہوا کا معیار اچھا رہا اور صرف ایک دن شدید آلودگی ریکارڈ کی گئی، جبکہ 2013 میں جب شہر نے باضابطہ طور پر پی ایم 2.5 کی نگرانی کے اعداد و شمار جاری کرنا شروع کئے تھے، شدید آلودگی کے 58 دن ریکارڈ کئے گئے تھے۔ فضائی معیار کے ایک اہم پیمانے پی ایم 2.5 کی سالانہ اوسط ارتکاز 2013 کے 89.5 مائیکروگرام فی مکعب میٹر سے کم ہو کر 2025 میں 27 مائیکروگرام فی مکعب میٹر رہ گیا، جو تقریباً 70 فیصد کمی ہے۔
اس پیش رفت نے بین الاقوامی توجہ بھی حاصل کی ہے۔ اقوام متحدہ کے ماحولیاتی پروگرام نے فضائی معیار بہتر بنانے میں بیجنگ کے تجربے کو دیگر شہروں کے لئے ایک نمونہ قرار دیا ہے۔
بیجنگ میونسپل ایکولوجیکل اینڈ انوائرنمنٹل مانیٹرنگ سنٹر کے ماہرین کے مطابق صاف ہوا ماحولیاتی نگرانی، سائنسی تجزیے، پالیسی سازی، علاقائی تعاون اور قانون کے نفاذ کو مربوط کرنے والے ایک جامع نظام کا نتیجہ ہے، جبکہ ڈیجیٹل ٹیکنالوجیز اب اس پورے عمل کے ہر مرحلے میں شامل ہو چکی ہیں۔
موثر ماحولیاتی انتظام کا آغاز درست نگرانی سے ہوتا ہے۔ بیجنگ نے فضائی معیار کی نگرانی کے لئے کثیر سطحی نیٹ ورک قائم کیا ہے۔ اعداد و شمار کے مطابق شہر بھر میں 35 معیاری مانیٹرنگ سٹیشن مسلسل 6 بڑے فضائی آلودگی کے عناصر کی پیمائش کرتے ہیں، جبکہ آبادیوں اور قصبوں میں نصب ایک ہزار سے زائد چھوٹے سینسر مقامی سطح پر فضائی معیار میں ہونے والی تبدیلیوں کے بارے میں مزید تفصیلی معلومات فراہم کرتے ہیں۔
