لندن (لارڈ میڈیا): ایران کی جانب سے آبنائے ہرمز کو فوری طور پر کھولنے کے لیے امریکہ سے متعدد مطالبات پورے کرنے کی شرط سامنے آنے کے بعد عالمی منڈی میں تیل کی قیمتیں تقریباً مستحکم رہی ہیں۔ دن کے آغاز پر تیل کی قیمتوں میں اضافہ ہوا، تاہم ایران کے مؤقف کے باعث یہ تیزی ختم ہوگئی۔ سرمایہ کاروں کو خدشہ ہے کہ آبنائے ہرمز کی فوری بحالی کے امکانات پہلے سے کم ہو سکتے ہیں۔
پاکستانی وقت کے مطابق صبح 11 بج کر 43 منٹ پر برینٹ خام تیل کی قیمت تقریباً 83.54 ڈالر فی بیرل رہی، جو تقریباً ایک فیصد کمی کے برابر ہے۔ اسی طرح امریکی ویسٹ ٹیکساس انٹرمیڈیٹ خام تیل کی قیمت 15 سینٹ یا 0.2 فیصد کمی کے بعد 78.03 ڈالر فی بیرل پر آگئی۔
عالمی مارکیٹ میں گزشتہ ہفتے تیل کی قیمتوں میں نمایاں کمی ہوئی تھی۔ اس کی بنیادی وجہ یہ امید تھی کہ ایران اور عمان کے درمیان مذاکرات میں پیش رفت ہو رہی ہے اور دونوں ممالک آبنائے ہرمز کے ذریعے تجارتی جہازوں کی آمدورفت بحال کرنے کے لیے کسی معاہدے تک پہنچ سکتے ہیں۔
تاہم ایران کی جانب سے یہ واضح کیے جانے کے بعد کہ آبنائے ہرمز کو مکمل طور پر کھولنے کے لیے امریکہ کو بعض مطالبات پورے کرنا ہوں گے، سرمایہ کاروں کی امیدوں کو دھچکا لگا ہے۔ ایران کا مؤقف ہے کہ آبنائے ہرمز کی بحالی کو خطے میں امریکہ کے رویے اور ایرانی مطالبات سے الگ نہیں کیا جا سکتا۔
