کراچی (لارڈ میڈیا): شہر قائد کے علاقے کلفٹن بلاک 5 میں پاکستان پیپلز پارٹی کے رہنما قادر پٹیل کے مرکزی دفتر پر مسلح افراد نے فائرنگ کی تاہم کوئی جانی نقصان نہیں ہوا۔
ذرائع کے مطابق کار میں سوار حملہ آوروں نے دفتر پر اندھا دھند فائرنگ کی اور اس دروازے کو نشانہ بنایا جہاں سے قادر پٹیل کا آنا جانا رہتا ہے۔
فائرنگ کے نتیجے میں متعدد گولیاں دروازے کو چیرتی ہوئی دوسری جانب تک جاپہنچیں تاہم جانی نقصان کی اطلاع نہیں ملی۔
واقعے کی اطلاع ملتے ہی پولیس کی بھاری نفری موقع پر پہنچ گئی جبکہ فرانزک ٹیم نے بھی جائے وقوعہ کا معائنہ شروع کردیا۔
پولیس اور فرانزک ماہرین نے جائے وقوعہ سے گولیوں کے خول جمع کیے اور فائرنگ کے شواہد کا جائزہ لیا۔ واقعے کی وجوہات اور حملہ آوروں کی شناخت کے لیے تحقیقات جاری ہیں۔
