چینی زبان کی سہولت سے آراستہ ایک کروز جہاز منگل کے روز اسپین کی شمال مشرقی بندرگاہ تاراگونا سے بحیرۂ روم کے 13 روزہ سفر پر روانہ ہوا ہے۔ جہاز پر تقریباً 900 مسافر سوار ہیں۔
عالمی سفری اور کروز کمپنی وائکنگ کے مطابق یہ کروز اسپین، فرانس، موناکو، اٹلی، یونان اور کروشیا کے 10 مقامات پر قیام کرے گا جس کے بعد اس کا اختتام اٹلی کے شہر وینس میں ہوگا۔
’’وائکنگ یی دُن‘‘ نامی یہ کروز جہاز شنگھائی سے 60 روزہ سفر مکمل کرنے کے بعد تاراگونا پہنچا تھا۔ اس سفر کے دوران جہاز میں 700 سے زائد مسافر سوار تھے اور اس نے ایشیا، افریقہ اور یورپ کے 16 ممالک میں واقع 27 مقامات کا دورہ کیا۔
بحیرۂ روم کا یہ سفر وائکنگ کے سال 2026 کے چینی زبان کی سہولت سے آراستہ یورپی سمندری کروز سیزن کا باضابطہ آغاز ہے۔ یہ سیزن اگست سے دسمبر تک جاری رہے گا اور اس میں آٹھ مختلف سفری پروگرام شامل ہیں۔
پیر کے روز تاراگونا میں منعقدہ افتتاحی تقریب سے خطاب کرتے ہوئے وائکنگ کے ایگزیکٹو چیئرمین ٹورسٹین ہیگن نے کہا کہ یہ سفر چینی منڈی کے لئے کمپنی کی اُن خدمات میں مزید توسیع کی علامت ہےجن کا آغاز 10 برس قبل کیا گیا تھا۔
بعد کے سفروں میں ایتھنز، سانتورینی، ڈوبروونک، استنبول، کوتور اور پیران جیسے مقامات بھی شامل ہوں گے۔ کمپنی نےسال 2027 میں شمالی یورپ کے مزید مقامات کو بھی اپنے سفری پروگرام میں شامل کرنے کا منصوبہ بنایا ہے۔
چینی سیاحوں کی یورپ کے سفر کے لئے دلچسپی تقابلی طور پر اب بھی نمایاں ہے۔ یورپی ٹریول کمیشن اور یوریل کی کے جون میں شائع کئے گئے ایک سروے کے مطابق 63 فیصد چینی شہریوں نے رواں برس مئی سے اگست کے درمیان یورپ جانے کا ارادہ ظاہر کیا۔ یہ تناسب سروے میں شامل سات طویل فاصلے کی سفری منڈیوں میں سب سے زیادہ ہے۔یورپ جانے کے خواہشمند تقریباً 60 فیصد چینی شہری پہلے ہی اپنی پروازیں بک کروا چکے تھے۔
میڈرڈ سے شِنہوا نیوز ایجنسی کے نمائندوں کی رپورٹ
